Силвија Митевска: На гости кај Обама

Точка

25/02/2019

10:26

3.653

Големина на фонт

а а а

Обама е исклучително харизматичен лидер. Но, и тој доцни како нашите политичари и тоа понекогаш и повеќе од час. Белата куќа имала минималното обезбедување при влезот, барем додека тој беше првиот човек на САД. Дозволено било фотографирање насекаде со мобилни телефони.

- Од посетата на Белата куќа научив дека и најневозможните работи можат многу лесно да се исполнат. Зад секое патување се крие една нова авантура која засекогаш ќе ве промени- раскажува за Точка, Силвија Митевска која имала ретка прилика да ја посети Белата куќа и да слуша говор на Обама во време на неговото претседателствување.

Како се случи посетата на Белата куќа?

- Во 2016-та година учествував на глобална спортско-менторска програма (Global Sport Mentoring Program), која траеше речиси два месеци со престој во Вашингтон, Њујорк и Калифорнија. На програмата бевме вкупно шеснаесет жени и секоја од нас имаше менторка која беше жена на раководна позиција во успешни компании, како Гугл, НХЛ (хокеј лига), Кошаркарска лига, Дизни и други. Преку менторство учевме за стратегиско планирање, унапредување на родовата еднаквост преку спортот и подобрување на лидерските и комуникациските вештини.

Се сеќавам, откако слетав во Вашингтон, веднаш, на првиот ден од обуката која беше многу интезивна и траеше од утро до вечер, се запознав со сите учеснички и со организаторките, прекрасните Ашли и Сара. Следниот ден на пауза за ручек, ме поттргнаа настрана и ме прашаа дали сакам да одам на инаугурација во Белата Куќа, каде претседателот Обама ќе им честита победата на Хокеарскиот тим Пингвини од Питсбург победа и освојување на престижниот Стенли трофеј. На почеток, мислев дека е некое трик прашање. Внимателно размислував дали постои погрешен одговор. Набрзо ми појаснија дека поканата е од мојата менторка Сузан, која е раководителка на оддел во Хокеј Федерацијата.

Опиши ни ја Белата куќа одблиску...

- Тоа што најпрво ме изненади е минималното обезбедување за влез во Белата Куќа. Замислував дека самото влегување ќе биде долго и мачно и ќе треба да поминам преку многу контроли, меѓутоа не беше така. Има две кратки контроли и веднаш сте во дворот.

 Второто изненадување е дека беше дозволено да ги понесеме внатре мобилните телефони и дозволено беше фотографирање насекаде. Направив над 100 фотографии. Првата фотографија, пред да стапнам во Белата Куќа ми е најомилена. Тогаш бев највозбудена.

Веднаш по влезот, има долг ходник на кој стојат обесено портрети од сите поранешни претседатели. Има и многу простории, налик библиотеки и во сите можевме да прошетаме.

Каков впечаток ти остави Обама?

- Не го сретнав целото семејство, туку само Обама. И тој како и нашиве политичари доцнеше, можеби повеќе од еден час. Најпрво имаше коктел па, влеговме во просторијата каде го одржа својот говор кој беше многу духовит. Обама е исклучително харизматичен лидер и многу ми е драго што ја посетив Белата Куќа додека тој беше претседател.

Што ќе паметиш најмногу од посетата?

- Она што најмногу ќе ги паметам се измешаните емоции, возбуда, среќа. Ќе го паметам моментот кога седев и го слушав неговиот говор, помислувајќи дека сум единствената Македонка која денес е присутна на тој голем настан. Благодарноста што ја чувствував кон мојата менторка, зашто никогаш не помислував дека еден ден ќе бидам гостинка на свечен спортски настав во Белата Куќа.

Што научи од непосредната средба со Обама?

- Сфатив дека харизмата е многу важна кај еден лидер и дека ако луѓето те сакаат, ќе те следат. Од посетата на Белата куќа научив дека и најневозможните работи можат многу лесно да се исполнат. Зад секое патување се крие една нова авантура која засекогаш ќе ве промени.

(А.В.)



Спонзорирани линкови

Маркетинг