Ако имате проблем со спиење, освен на исхраната и вежбањето, треба да обрнете внимание и на температурата на просторијата во која спиете.
Тешко е да заспиете ако ви е претопло, но температурата никогаш не ја сметаме за важен фактор за квалитетно спиење, а тоа е погрешно.
Исто така, погрешно е ако мислиме дека кога спиеме треба да се 'стуткаме', да нѝ биде пријатно и топло. Кога се наближува времето за спиење, нашето тело почнува да се лади, температурата паѓа за околу 2 степени, за да се доведеме до состојба за спиење.
Спиењето во ладна просторија помага во одржување пониска температура на телото, што резултира со квалитетен, длабок и долг сон.
Според американските експерти, како што пренесува „Yahoo Lifestyle“, најдобрата температура за квалитетен сон е помеѓу 15 и 20 степени Целзиусови.
Најнеприкладната температура сè уште не е дефинирана, но за таква се смета секоја при која чувствувате дека ви е топло, бидејќи во вакви услови е многу тешко да заспиете и да спиете без будење до утрото.
Денес ги грееме спалните соби, што некогаш не беше обичај. Порано луѓето спиеле во ладни соби и би било добро да земеме пример од нив. Ако спиете во иста просторија во која го поминувате денот, пред спиење добро е да ја проветрите и секако, да го изгаснете греењето.
Освен температурата во собата, за подобар сон треба да водите сметка и за тоа што вечерате - се советуваат лесни оброци или прескокнување на вечерата и никако стимуланси како кофеин - кафе не треба да пиете во попладневните часови и навечер, а треба да избегнувате шеќер и алкохол.