Алојз Абрам, модно освестен дедо, е голем хит на социјалната мрежа Инстаграм.
Тој е роден и израснат во Словенија, а на Инстаграм е познат под прекарот „Gramps“. Зад неговиот профил всушност стојат тој и внукот кој модно го советува и фотографира.
Абрам обожува улична мода, а исто така ужива и во рекреирање на модните комбинации на познатите личности.
„На Божиќ 2016 година го прашав мојот дедо дали сака да ја проба мојата облека. Изненадувачки тој прифати, а кога го направи тоа, изгледаше толку кул што веднаш посакав да го фотографирам. Две недели подоцна, ја објавив првата фотографија од „Gramps“ на Инстаграм и сите беа воодушевени. Откако ја направивме првата фотографија, продолживме понатаму и оттаму започна сè“, раскажал неговиот внук, 23-годишниот Јаник Дајфенбах за „LADBible“.
Дедото и внукот на Инстаграм ги следат милион луѓе, а како што вели Јаник, заедничкото хоби уште повеќе ги зближило.
„Отсекогаш сме биле многу блиски, секој вторник игравме пинг-понг и фудбал и заедно одевме на шопинг. Се навикнав да го посетувам него и мојата баба. Откако започнавме да се фотографираме, мојот дедо и јас сме уште повеќе зближени“.
Внукот раскажал и дека Алојз посетува теретана 3 пати во неделата за да остане во форма.
„Тој е најмирната личност која ја познавам, никогаш не се нервира. Освен тоа посетува теретана 3 пати неделно за да остане во форма. Се надевам дека ќе бидам како него кога ќе остарам“, вели Јаник.
Модните комбинации за „Gramps“ ги бира неговиот внук, а интересно е дека дедото ја носи таквата облека и во секојдневниот живот.
„Се согласив да ја пробав неговата облека бидејќи мислев дека ме прашува од забава. Меѓутоа, ми се допадна и потполно го променив својот стил на облекување. Уживам да поминувам време со внукот, да патувам и да добивам нова облека и обувки. За мене тоа е хоби, а сега се навикнав и да позирам за фотографии. Инспирација ми е семејството, а особено мојата сопруга која го обожува мојот стил и нашето хоби. Денес не ме пушта да излезам од дома без капа и добри патики и е среќна што уживам во ова“, вели Абрам.