На технолошки настан во Москва се случи непријатна сцена за време на претставувањето на првиот руски хуманоиден робот со вештачка интелигенција, наречен „AIdol“. Роботот, кој требаше да симболизира нов чекор во развојот на домашната роботика, доживеа дефект и се сруши на бината само неколку моменти откако излезе пред публиката.
Роботот се појави на сцената со култната музика од филмот „Rocky“, но ентузијазмот траеше само неколку секунди. „AIdol“ веднаш почна да се ниша како пијан човек, ја изгуби рамнотежата, падна и зад себе остави неколку делови разфрлани по подиумот. Публиката остана збунета, а организаторите веднаш реагираа — додека неговите придружници го изнесуваа од сцената, техничарите трчаа да го скријат од погледите на присутните.
Како што пренесува „Newsweek“, според изјавата на организаторите, „AIdol“ бил развиен како „напреден пример на антропоморфна роботика“, изработен претежно од руски компоненти — со цел да се покаже технолошката самостојност на земјата во оваа област. Сепак, дефектот што се случи за време на јавното претставување фрли сенка врз настанот и го засени очекуваното достигнување.
Снимките од инцидентот брзо се појавија на социјалните мрежи и на независните руски портали, предизвикувајќи бројни реакции — од загриженост до потсмев. Додека едни коментираа дека станува збор за вообичаени технички проблеми што ги придружуваат раните фази на развој на сложени машини, други цинично забележаа дека овој пад симболично ја отсликува вистинската состојба на руската технолошка индустрија.
