Многу репрезентации претрпеа порази од Франција низ годините поради феноменалните погодоци на Никола Карабатиќ (40), меѓутоа тој повеќе не настапува за репрезентацијата, а најголемиот адут на Франција сега е неговиот помлад брат Лука (36).

Во меѓувреме Никола изјави дека навивал за Хрватска во четвртфиналето против Унгарија, но што ќе биде утре кога Хрватите ќе играат против неговата репрезентација и неговиот брат? „Никола рече дека ќе дојде доколку се пласираме во полуфиналето. Знаеме дека тоа за нас е секогаш посебен натпревар, навистина е посебно да се игра во Хрватска“, рече Лука потоа.

Семејство

Никола Карабатиќ е роден на 11 април 1984 година во Ниш, Србија, додека неговиот помлад брат Лука е роден на 19 април 1988 година во Стразбур, Франција. Нивниот татко Бранко Карабатиќ, Хрват од Врсин кај Трогир, беше професионален ракометар, а настапувал за клубови како РК Трогир и РК Механика од Метковиќ.

Мајката Радмила, Србинка од Алексинац, завршила студии по медицина во Ниш.

Семејството се преселило во Франција кога Никола имал три години, каде што браќата пораснале и ја започнале својата спортска кариера.

Никола

Ракометната кариера Никола ја започна во младинските редови на Монпелје, а професионално дебитираше во 2000 година за сениорскиот тим на истиот клуб. Во текот на својата кариера настапуваше за Кил, Монпелје, Пејс д’Акс, Барселона и Пари Сен Жермен.

Со француската репрезентација освои бројни медали, вклучувајќи златни на Олимписките игри 2008 и 2012 година и на Светските првенства во 2009, 2011, 2015 и 2017 година. Исто така Никола беше прогласен за најдобар играч на ЕП во 2008 година.

Од 2011 година тој е во врска со поранешната гимнастичарка Жералдин Пиле, со која го доби синот Алек во 2016 година.

Лука

Лука првично тренирал тенис, а го освои француското првенство за десетгодишници во 1998 година. На 19 години почна да тренира ракомет во младинскиот тим на Монпелје, додека во 2009 година се приклучи на сениорскиот тим.

По Монпелје настапуваше за Пеј д’Акс, а од 2015 година заедно со неговиот брат Никола настапува за Пари Сен Жермен. Со француската репрезентација го освои Светското првенство во 2015 година и олимпиското злато во 2020 година.

Лука е во брак со манекенката и ТВ водителка Џени Приез, со која има две ќерки, Дева, родена во 2017 година и Дали, родена во 2022 година.

Скандал

Во 2012 година, браќата Карабатиќ беа во центарот на скандалот поради наводното местење натпреварите помеѓу Монпелје и Сесон-Рен Метропол ХБ.

Двајцата беа уапсени и обвинети, но подоцна беа ослободени со кауција. После тоа, тие го напуштија Монпелје и потпишаа за Пеј д’Акс.