Патентот со име „Shifter Assembly For Electric Vehicle“ (Склоп на менувач за електрично возило) претставува иновативен пристап во возењето на електрични автомобили, кој би можел да го промени начинот на кој ги доживуваме овие возила. Суштината на патентот е рачката на менувачот, која имитира класичен шестостепен менувач, но со целосно поинаква технологија во позадина.

За разлика од традиционалните рачни менувачи кои физички ја контролираат преносната моќност, системот на "Ford" користи електронски контролери на моќноста и актуаторски системи за да го симулира процесот на менување брзини. Кога возачот ја поместува рачката на менувачот, електронски сигнали се испраќаат до електричниот мотор на возилото, менувајќи ја излезната моќност и создавајќи илузија на работа на конвенционален менувач со квачило.

Она што е особено импресивно е фактот што системот дури и ги симулира карактеристичните прекини во моќноста кои се случуваат при менување брзини во класичните автомобили со мануелен менувач, со што дополнително се засилува автентичноста на искуството.

Повеќе од обична симулација

Патентот на "Ford" покажува дека рачката на менувачот може да биде конфигурирана да функционира на повеќе начини. Теоретски, може да се користи како секвенцијален менувач или да следи стандардно шестостепено поставување. За да биде искуството уште пореално, во основата на рачката се вградени мали електромотори кои создаваат повратна сила и вибрации, симулирајќи го чувството што возачите го доживуваат при менување брзини во автомобили со мотори со внатрешно согорување.

Овој чекор на "Ford" доаѓа откако "Hyundai" веќе претстави слична технологија во својот модел "Ioniq 5 N", кој вклучува функција "N e-Shift", што го симулира чувството на мануелен менувач. Истовремено, Toyota исто така експериментира со симулирани менувачи за своите идни "Lexus" модели.

Иако можеби звучи контрадикторно да се додаваат симулирани менувачи во возила кои во суштина не бараат промена на брзини, овој тренд покажува дека автомобилските производители ја препознаваат важноста на емоционалната поврзаност што многу возачи ја имаат со традиционалното рачно менување брзини и активно бараат начини да го зачуваат тој елемент и во електричната ера.

Засега не е познато дали "Ford" планира да го имплементира овој патент во некој од своите идни електрични модели, но самата инвестиција во развој на оваа технологија укажува на тоа дека компанијата сериозно ја разгледува можноста за нејзина примена.