Ова е прв пат во историјата на Украина да биде откриен ваков облик на шпионажа, соопшти СБУ, објави Укринформ.

Според информациите од истрагата, задачата на таа шпионска мрежа била да собира податоци за воената безбедност на регионот, истражувајќи ги ранливостите во копнената и воздушната одбрана, како и социо-политичките ставови на локалното население, соопшти СБУ.

Посебен фокус бил ставен на истражување на реакциите на евентуалното влегување на унгарските трупи во регионот. За време на операцијата, СБУ приведе двајца агенти кои припаѓале на таа мрежа, а кои биле поранешни припадници на украинската војска.

Истрагата покажа дека агентите работеле под надзор на унгарски воени разузнавачки службеници.

Еден од нив, поранешен војник од областа Берегово, бил регрутиран во 2021 година и активиран во септември 2024 година. Неговата задача била да го истражи однесувањето на локалното население, состојбата на црниот пазар, воената опрема во регионот, како и информации за воените и цивилните структури во Закарпатскиот регион.

Агентот, исто така, ги извидувал локациите на клучните одбранбени системи, вклучувајќи ги и ракетните системи С-300. Откако ги собрал потребните информации, агентот отишол во Унгарија, каде што ги предал информациите и примил пари од разузнавачкиот службеник.

СБУ, исто така, откри дека агентот се обидел да регрутира најмалку две лица за соработка со унгарските разузнавачки служби.

Приведена е и една членка на украинските безбедносни сили

Како дел од истрагата, СБУ притвори уште една осомничена личност – поранешна припадничка на украинските безбедносни сили, која соработувала со унгарските специјални служби.

Против сите осомничени поднесена е обвинение за предавство во услови на воена состојба и се соочуваат со доживотен затвор со конфискација на имот.

Операцијата била спроведена под надзор на Канцеларијата на државниот обвинител, а СБУ ја продолжува истрагата.

Реакција на Унгарија

Унгарскиот министер за надворешни работи, Петер Сијарто, изјави во петокот дека украинските обвинувања дека во Украина е откриена унгарска шпионска мрежа се чиста „пропаганда“. „Би ги замолил сите да бидат претпазливи во врска со сите такви извештаи што се појавуваат како дел од украинската пропаганда“, рече Сијарто на прес-конференција.

„Доколку добиеме какви било детали или официјални информации, ќе можеме да се справиме со таквите информации, а дотогаш сето ова морам да го класифицирам како пропаганда кон која треба да се однесуваме со претпазливост“, додаде унгарскиот министер.

„Во текот на примирјето Русија нападна 8 населени места и тоа 220 пати“

Во текот на претходните 24 часа, руските сили извршија 220 напади врз осум украински населби во близина на линијата на фронтот, и покрај официјалниот прекин на огнот што стапи на сила, изјави гувернерот на Запорожската област, Иван Федоров.

Според неговите изјави објавени на платформата Телеграм, населбите во таа област биле погодени од 150 беспилотни летала и 70 артилериски гранати, пренесе Ројтерс.

Рускиот претседател Владимир Путин претходно објави еднострано примирје кое стапи на сила на полноќ во четврток, но украинските власти тврдат истото не било испочитувано.

Гладков: Украинско беспилотно летало ја нападна владината зграда во Белгород

Беспилотно летало на украинските вооружени сили ја нападна владината зграда на руската Белгородска област, а во нападот нема жртви, објави денес на Телеграм гувернерот на регионот, Вјачеслав Гладков.

„Во Белгород, дрон на украинските вооружени сили ја нападна владината зграда на Белгородската област. Нема жртви. Сите служби за итни случаи работат на самото место“, напиша Гладков, пренесе РИА Новости.

Тој додаде дека свечените настани по повод Денот на победата над фашизмот во Втората светска војна се одржале според планот, земајќи ги предвид преземените максимални безбедносни мерки, пренесе агенцијата.