Пред неколку години, се чинеше дека начинот на кој работат луѓето засекогаш се промени, и дека времето на преполнети корпоративни канцеларии остана во минатото. Вработените, принудени од пандемијата со коронавирусот, ги открија сите предности на работењето од дома, и многумина решија никогаш повеќе да не се вратат во канцелариите. Технолошките компании развија бројни алатки што го поддржуваат овој модел, а "Zoom" стана синоним за работни состаноци.

Сепак, како што пандемијата избледе на маргините, сè повеќе компании почнаа да ги повикуваат вработените назад во канцелариите – некои постојано, а некои преку хибриден модел, односно со комбинирање на работа од далечина и присуство во канцеларија.

Една од ретките компании која сè уште им овозможува на своите вработени најголемиот дел од времето да работат од каде што сакаат е "Dropbox". Во гостување на поткастот "Leadership Next", извршниот директор на компанијата, Дру Хјустон, објасни и зошто.

„Губење е и време и пари да ги тераш луѓето да се враќаат три пати неделно во автомобил само за да седат на ист "Zoom" состанок како што би го направиле и од дома. Постојат попаметни решенија“, изјави Хјустон – став со кој сигурно би се согласиле повеќето кои го преферираат далечинскиот модел.

Доверба пред контрола

Постојат различни причини зошто многу компании – вклучително и големите технолошки имиња – ги враќаат вработените во канцелариите. Иако тоа ретко се признава јавно, една од главните причини е желбата на менаџментот да има директен надзор врз вработените, стравувајќи дека од дома ќе бидат помалку продуктивни.

Пред неколку години, Хјустон коментираше дека таквите менаџери треба да се ослободат од потребата за целосна контрола.

„Ако им верувате на луѓето и ги третирате како возрасни, тие и ќе се однесуваат така. Довербата треба да биде поважна од надзорот.“

Официјалното објаснување на многу директори е дека вработените се покреативни и поефикасни кога се физички присутни, кога заедно решаваат проблеми, разменуваат идеи и соработуваат во реално време. Според нив, тоа е потешко да се постигне преку екрани и интернет алатки.

Хјустон го спореди враќањето во канцеларии со обидот луѓето повторно да се натераат да одат во трговски центри или кина: „Иако нема ништо лошо во кината, светот денес едноставно е поинаков“, рече тој.

Во "Dropbox", вработените имаат можност до 90 отсто од своето работно време годишно да го поминат работејќи од далечина. Преостанатите 10 проценти се резервирани за учество на одредени настани, кои најчесто се одржуваат надвор од канцеларија.