Сонот на секоја разузнавачка агенција изгледа како голем комарец, има две ситни крилја слични на пердуви, тесно тело и стои на три нозе.

Сепак, тоа не е комарец, туку мини-дрон развиен од Националниот универзитет за одбранбена технологија (NUDT) на Кина.

Наменет е за тајни воени операции и извиднички мисии, пренесе хонгконшкиот весник „Саут Чајна Морнинг Пост“. Извидничкиот дрон бил претставен во репортажа на воениот канал „CCTV7“ на кинеската државна телевизија.

Едвај забележливиот дрон го претставил истражувачот од „NUDT“, Лијанг Хешјанг, кој исто така работи на хуманоидни роботи.

„Еве во мојата рака робот сличен на комарец. Минијатурните бионички роботи како овој се особено погодни за разузнавачки извиднички мисии и специјални операции на бојното поле“, рече Хешјанг.

Исто така, бил прикажан прототип на уште еден мини дрон со четири крилја што може да се контролира преку паметен телефон.

Трката за развој на најмалите дронови

Изненадувачки е не само напредокот што го постигнала кинеската војска во областа на роботската технологија, туку и фактот дека шпионски дрон со големина на комарец бил јавно изложен.

Со години, воените инженери ширум светот се натпреваруваат да произведат колку е можно помали и помоќни дронови. Компонентите како што се микрофони и камери, напојувањето и другите делови мора да се вградат на што е можно помалку простор. Истовремено, дронот мора да биде тивок, издржлив и да има голем дострел.

Развојот на мали дронови бара знаење од роботиката, науката за материјали и сензорската технологија – експертиза која е првенствено достапна во воените институции.

Впечатливи сличности со американскиот модел

Не е само кинеската војска таа што масовно го охрабрувала развојот на мини дронови. Нивните имиња честопати се поврзани со пчели, стршлени или комарци, бидејќи природата често служи како инспирација за овие бионички мини-роботи.

Мини дронот кој го претстави кинескиот „NUDT“ има впечатлива сличност со дронот „RoboBee“, кој истражувачите од Харвард првпат го претставија на јавноста во 2013 година.

Меѓутоа, дронот долг приближно три сантиметри бил развиен за потребите на земјоделскиот сектор и мониторингот на животната средина – а кинеската верзија е значително помала.

Некои автономни модели на дронови „RoboBee“ можат да пливаат под вода и оттаму да полетаат. Или „со помош на статички електрицитет да се залепат за површини“, според веб-страницата „Wuss“ на Харвардскиот институт.

Нано дронови за борбена употреба

Сепак, овие мали извиднички дронови не се доволно цврсти за борбени мисии. Дроновите во вакви акции мора да издржат ветер и тешки временски услови, сликите и податоците мора да бидат прецизни, траењето на батеријата мора да биде долго, а управувачкиот систем мора да биде таков што војниците можат да ги користат дури и од безбедна, оддалечена позиција.

Затоа воениот персонал сепак е повеќе воодушевен од дронот „Black Hornet“ (Црн Стршлен) со големина на дланка, кој бил развиен во Норвешка и кој се користи веќе неколку години за безбедно извидување за време на борбени мисии.

Исто така и германскиот Бундесвер го набави овој дрон, кој наликува на мал хеликоптер, за „тивко оптичко извидување во тактичко блиска околина“.

Според Бундесверот, ваквите дронови „им овозможуваат на војниците да вршат моментално, прикриено извидување дури и без посебна обука“.

„Црниот Стршлен“ има инфрацрвена технологија, „многу е лесен и практично нечуен. Со време на лет до 25 минути, џебниот нано-дрон може да испорачува видео-снимки и фотографии во живо со висока резолуција“, и на тој начин, на пример, да открива експлозивни стапици.

Американската војска исто така работи на верзии на мини дронови, соопштија американските воздухопловни сили уште во 2021 година. Сепак, американската војска не дава детали за тоа колку напреднал развојот и кои модели веќе се во употреба.