Новите мерки опфаќаат високи парични казни, одземање на возачка дозвола, таблички, па дури и затворски казни, вклучувајќи доживотен затвор за најтешките случаи.

Грција е одлучна да го намали бројот на сообраќајни несреќи, па од 14 септември 2025 година воведува нов, построг кодекс за безбедност во сообраќајот. Казните ќе бидат повисоки од претходно, а законот важи и за странски државјани, вклучувајќи ги и туристите кои доаѓаат со сопствени и изнајмени возила.

Казните ќе се движат од 350 до 8.000 евра, а предвидени се и суспензии на возачки дозволи, одземање регистарски таблички, па дури и затворски казни.

Најважни измени во законот:

- Користење мобилен телефон во текот на возењето: Казни од 350 до 4.000 евра, суспензија на возачка дозвола до 8 години. Во случај на несреќа – можна доживотна затворска казна.

- Неносење безбедносен појас или кацига: Казни од 350 до 2.000 евра, суспензија на дозвола до 12 месеци и за возачот и за патниците.

- Возење под дејство на алкохол: Казни до 4.000 евра, суспензија на дозволата до 10 години, затвор до 5 години, во случај на фатална несреќа – доживотна затворска казна.

- Надминување на ограничената брзина: Казни до 2.000 евра, суспензија на дозвола до 1 година, во случај на незгода – казна од 8.000 евра и одземање на дозволата до 4 години.

- Поминување на црвено светло или непрописно запирање: Казни до 4.000 евра, суспензија на дозволата до 8 години, а во тешки случаи – затворска казна.

- Возење без дозвола: Казна до 4.000 евра, одземање на право на добивање возачка дозвола до 8 години, со можност за затвор од 2 години.

- Попречување на железничкиот или јавниот превоз: Казни до 4.000 евра, суспензија на дозвола до 8 години, затвор до 20 години, а во случај на несреќа – доживотна затворска казна.

- Паркирање на места за лица со инвалидитет: Казни од 150 до 2.000 евра со можност за забрана за возење до 1 година.