Професорот Расел Вин, директор на организацијата „Wild New Forest“, изјави дека малите дрволики бубамари биле пронајдени во стапици за молци низ Новата Шума (New Forest), но дека „немало потврдени британски наоди пред овој бран“, објави Би-би-си.

Тие обично живеат во Франција и континентална Европа, но сега го преминале Ламанш и се населиле во Саутемптон и Новата Шума, рече професор Вин.

Вин, кој е и претседател на Форумот за биодиверзитет на „Wild New Forest“, рече дека топлото време оваа година било тешко за некои мочуришни животни, но „за многу инсекти, вклучувајќи ги и бубамарите, тоа беше добра година“.

Тој истакна дека тоа е еден од многуте видови крилести инсекти кои го колонизирале јужниот дел на Англија поради зголемувањето на температурите.

„Постојат многу докази дека молците и пеперутките се движат кон север и постепено колонизираат“, рече Вин.

Бубамарата со 13 точки се врати во Новата шума благодарение на проектите за обнова на видовите.

Новата шума (New Forest) е дом на древни шуми, тресетишта, вриштини и мочуришта, што ја прави разновидно живеалиште.

„Квалитетот на живеалиштата во Новата шума и работата што ја вложуваме во нивното проширување и обновување нè прави соодветно место за видовите што го преминуваат каналот и бараат соодветно живеалиште за колонизација“, рече професор Вин.

„Wild New Forest“ е една од групите вклучени во Фондот за преживување на видовите (SSF), во чии рамки се работи на околу 24 локации во националниот парк за зачувување на природата.

„Мали скапоцени камења“

Професорот Вин рече дека по еколошко истражување на еден локалитет, ја пронашол бубамарата со 13 точки за прв пат по 20 години.

„Доста е ретка на национално ниво и добро е повторно да се регистрира во Новата шума, особено таму каде што ќе работиме на создавање нови мочуришта. Иднината на видот изгледа добро бидејќи таму ќе има убав комплекс од мали езерца следната година“, рече тој.

Покрај тоа и „Hippodamia variegata“, позната како Адонис бубамара, била видена во сувите делови од шумата.

„Во период на промени сме кога станува збор за нашиот биодиверзитет поради климатските промени. Ако можеме да обезбедиме дом за видови кои природно колонизираат и се селат на север, мислам дека тоа е позитивно, бидејќи тоа се видовите кои ќе напредуваат во наредните децении додека температурите продолжуваат да растат“, рече Вин.

Тој сака да ги охрабри луѓето да прифатат нови видови и да поминуваат повеќе време во шумата, обрнувајќи внимание на приближно 20.000 видови животни, растенија и габи што постојат таму.

„Ако го направите тоа, ќе бидете наградени со некои од овие мали бисери“, рече тој.

„Видовите што пристигнуваат сега веројатно ќе бидат доминантни во наредните децении и векови, па затоа треба да им посакаме добредојде бидејќи тие ќе го одржат нашиот биодиверзитет и ќе обезбедат и по 100 години да имаме див свет за набљудување“, нагласи Вин.