Филозофот и музичар Диего Лондоњо (41), кого неговото семејство го барало две години откако исчезнал во Перу, конечно е пронајден благодарение на видео објавено на ТикТок. Иако приказната има среќен крај, има и неочекуван пресврт.
Млада Еквадорка, Ами Солано, снимила видео во Мачала, Еквадор, на почетокот на септември во кое пробувала облека додека еден маж ја гледал низ прозорец. Потоа го објавила видеото на ТикТок, а истото брзо привлекло големо внимание.
Меѓу многуте коментари, еден особено ја заинтригирал: „Тој е Диего Лондоњо од Колумбија. Тој ми е брат и го бараме две години.“ Неговото семејство ја контактирало и објаснило дека човекот, сега идентификуван како Диего Лондоњо, страда од губење на меморијата и исчезнал пред две години.
Недели подоцна, нови фотографии, овој пат од Манкора, во регионот Пиура, потврдиле дека Диего се наоѓа на перуанска територија. Сепак, тој не бил пронајден сè до раните утрински часови во четврток, 25 септември, кога полицајците од полициската станица Лагунас-Мокупе го виделе како оди по автопатот Панамерикана Норте и го препознале.
Доброволниот номад не сака да се врати дома
Сепак, локалните медиуми објавија дека Лондоно, кој е опишан како „доброволен номад“, можеби нема да се врати дома наскоро. Перуанската национална полиција изјави за „RPP“ дека тој самиот им кажал дека не сака да се врати во Колумбија. „Тој самиот рече дека не сака да се врати дома“, соопшти полицијата.
Властите потврдиле дека тој не е во опасност или запоставен. Тој поминал една ноќ во полициската станица, каде што му била дадена храна, облека и можност да контактира со семејството. Разговарал по телефон со своите сестри Олга, Марта и Лусија, кои рекле дека ќе ја почитуваат неговата одлука. „Нема пријава за исчезнато лице. Разговарал со своите сестри и јасно ставил до знаење дека не сака да се врати дома“, рекоа властите.
Тие додадоа дека тој одбил психолошка процена, но дека не покажувал знаци на здравствени проблеми за време на престојот во станицата. Тој бил опишан како полиглот кој патува низ земјата и заработува за живот продавајќи бронзени и бакарни ракотворби. Лондоно сега планира да отпатува во Лима, а полицијата го советувала периодично да се јавува во полициската станица за да комуницира со семејството и да избегне идни лажни тревоги.
Во разговор за „Éxito Noticias“, тој самиот ги потврдил своите планови: „Тешко ми е да објаснам дека не сум како другите луѓе, но моето семејство е таму. Од тука до Лима, а оттаму назад во Колумбија. Морам малку да работам, речиси никогаш немам планови“.
