Гостувајќи во поткастот „Human Talk“, Секстон објасни дека паровите кои инсистираат на грандиозни прослави често влегуваат во брак од погрешни причини.

„Верувам дека понекогаш, колку е поголема венчавката, толку е поверојатен разводот. Тоа е моето искуство“, изјави тој.

Ваквите венчавки ги нарече „исклучително перформативни“ и „нарцисоидни“, додавајќи дека уште еден показател може да биде и нереално големиот свршенички прстен.

Тој смета дека целиот спектакл – од објавата на свршувачката на социјалните мрежи, преку низа забави и планирање во кое невестата е во центарот на вниманието, па сè до моминската забава и медениот месец – всушност се сведува на привлекување внимание.

„Ако ова ви е навистина важно, тоа многу ми зборува за вас. Ми кажувате колку ви е важно да бидете во центарот на вниманието“, заклучи Секстон.

И други професионалци се согласуваат

Се чини дека Секстон не е единствениот што го дели ова мислење. Откако го изнесе својот став, се огласија и други професионалци од индустријата за венчавки.

„Бев фотограф на венчавки пет години. Осумдесет проценти од венчавките на кои работев завршија со развод. Морав да додадам нова клаузула во договорот затоа што луѓето бараа поврат на пари по разводот“, напиша еден корисник.

Слични искуства споделија и други.

„Јас сум шминкерка и можам сто проценти да кажам кој ќе се разведе според тоа како поминува утрото на невестата и како младоженецот се однесува кон неа“, напиша една корисничка.

Професионален виолинист кој свирел на стотици венчавки кратко додаде: „Сто проценти се согласувам со ова“.

Еден од коментарите ја сумира целата идеја: „Повеќето луѓе планираат венчавка, а не брак“.

Знаци што ги забележува организаторка на венчавки

Искуствата од терен ги потврди и организаторката на венчавки Бирди, која тврди дека може да препознае кога парот не е подготвен за долгорочна врска. Еден од знаците, според неа, е популарниот тренд кога младенците си мачкаат торта по лицето еден со друг.

„Не знам што треба да претставува тоа, но ниту една од моите невести и младоженци кои го правеле ова повеќе не се заедно“, изјави таа.

Друг лош знак е кога еден од партнерите тајно планира трошоци надвор од договорениот буџет, на пример барајќи од неа да додаде поскапо цвеќе без знаење на свршеникот.

„Тие луѓе се разведуваат“, изјави Бирди.

За проблематични ги смета и младоженците кои воопшто не се заинтересирани за планирањето.

„Ако неговата единствена задача била да избере диџеј, а ние сме една недела пред венчавката и тој сè уште не го направил тоа, тој сопруг е целосно исклучен“, објасни Бирди.