„Volvo“ го врати Томас Ингенлат, дизајнерот „виновен“ за популарноста на брендот

Ингенлат работеше во „Volvo“ во текот на 2010-тите години и во голема мера го дефинираше визуелниот идентитет на брендот во тој период. Под негово водство, автомобилите на „Volvo“ добија воздржан, скандинавски дизајн, што ѝ помогна на компанијата да ја зајакне својата позиција во премиум-сегментот и да го прошири присуството на меѓународните пазари. Пред девет години тој го напушти Гетеборг за да се вклучи во развојот на „Polestar“, кој во тоа време беше подружница на „Volvo“.

За време на неговото отсуство, „Volvo“ помина низ неколку различни фази. По пандемијата, компанијата забележа рекордни резултати во периодот меѓу 2023 и 2024 година, но во 2025 година глобалниот обем на продажба забележливо опадна. Состојбата останува особено сложена на кинескиот пазар, каде што побарувачката за автомобилите на „Volvo“ опаѓа веќе неколку години по ред.

Враќањето на Ингенлат доаѓа во време на стратешки промени во компанијата. „Volvo“ сè повеќе се насочува кон електрични возила, софтверски платформи и автоматизирани системи, а дизајнерскиот оддел се соочува со предизвикот да ја зачува препознатливоста на брендот во услови на технолошка трансформација. Не станува збор за редизајн на постојната понуда, туку за обликување на имиџот на „Volvo“ во следната фаза од неговиот развој.

Меѓу двата периоди поминати во „Volvo“, Ингенлат седум години го водеше „Polestar“. Под негово раководство, брендот се трансформираше од нишов проект во глобален производител на електрични возила, присутен во повеќе од 20 земји. Моделите „Polestar 1“ и „Polestar 2“ ги поставија темелите за развојот на брендот, додека „Polestar 3“ и „Polestar 4“ обезбедија проширување на понудата на модели. Во меѓувреме, „Polestar“ разви сопствен минималистички дизајнерски јазик, кој се разликува од помекиот стил карактеристичен за „Volvo“.

Во 2024 година „Polestar“ се соочи со сериозни финансиски тешкотии – продажбата опадна, како и вредноста на акциите. Истата година Ингенлат ја напушти позицијата генерален директор, која ја презеде поранешниот прв човек на „Opel“, Михаел Лошелер.