Во вирално видео на ТикТок тој сподели пет фрази кои често откриваат дека некој не ја зборува вистината.

„Можеби е безопасна лага. Можеби е нешто кажано од љубезност, а не од намера за измама, но сите лажеме секој ден“, вели Когдел, додавајќи пример: „‘Како си? Добро сум’. Тоа е проклета лага“.

„Колку што се сеќавам“

Ако некој ја започне реченицата со оваа фраза, голема е веројатноста дека се обидува да купи време. Според Когдел, на тој начин луѓето се „дистанцираат од вистината“. Додека ги бираат и обработуваат зборовите, тие всушност „го оправдуваат она што допрва ќе ви го кажат“.

„Да бидам искрен“

Оваа фраза особено го иритира искусниот адвокат. Тој го поставува логичното прашање што таа го наметнува: „Ако велите дека сега сте искрени, дали тоа значи дека претходно никогаш не сте биле искрени?“.

„Секогаш сум“ или „Никогаш не сум“

Когдел истакнува дека апсолутните тврдења ретко се вистинити. Малкумина навистина секогаш или никогаш направиле нешто. „Значи, никогаш не сум лажел или секогаш ја зборувам вистината? Тоа е глупост“, вели тој без задршка во видеото.

Повторување на поставеното прашање

Ова е класична стратегија за купување време. Когдел наведува пример со сопружник кој е прашан каде бил претходната ноќ. На прашањето: „Душо, каде беше синоќа?“, тој одговара со контрапрашање: „Хм, каде бев синоќа?“. „Тие буквално купуваат време за да смислат соодветен одговор за кој мислат дека ќе го прифатите“, објаснува тој. Сепак, предупредува дека треба да се биде внимателен, бидејќи ехолалијата – повторувањето на прашања – е чест симптом и кај лица со АДХД.

Избегнување на темата

Петтата техника е избегнување директен одговор и префрлање на темата. Ако на прашање како: „Дали синоќа беше во стриптиз-клуб?“, добиете одбранбен одговор од типот: „Зарем немаш попаметна работа од тоа да се прашуваш дали сум бил во стриптиз-бар?“, тоа е јасен знак на манипулација. „Ако избегнуваат и скршнуваат од темата, тоа најчесто е знак“, заклучува Когдел.

Контекстот е клучен

Когдел нагласува дека неговата листа не е апсолутна и дека секогаш постојат исклучоци. „Ова се општи правила. Сè зависи од контекстот, од вашата блискост со личноста и од нејзините говорни навики. Нема ништо конкретно на листата – тоа е само почетна точка“, објаснува тој. Покрај вербалните знаци, додава дека невербалните сигнали и говорот на телото се „подеднакво важни“.

Најголемите лажговци? Адвокатите

За крај, Когдел искрено открива кои се, според него, најголемите мајстори во извртувањето на вистината. „Адвокатите се најголемите лажговци на планетата“, вели тој. „Професијата поттикнува нечесност и става акцент на креативноста и развлекувањето на вистината“.

На прашањето кога тој самиот лаже, одговара: „Кога немам избор и кога мислам дека одговорот ќе предизвика повеќе болка отколку вистината“. Тврди дека никогаш намерно не лажел на суд, но додава: „Дали сум создал разумно сомневање и дали сум аргументирал нешта што биле разумни дедукции од доказите? Апсолутно. Но, дали некогаш сум поттикнал лажно сведочење или свесно сум лажел? Морам да кажам дека јас би го поминал тој тест, иако некои други можеби не би се согласиле“.