Компанијата „Rimac Automobili“ го претстави првиот примерок од ексклузивната "Nevera R Founder’s Edition" на престижниот зимски автомобилски настан „The I.C.E. St. Moritz“.

Станува збор за лимитирана серија од само десет возила, која беше целосно распродадена за само една недела по најавата.

Уникатен дизајн и ексклузивност

Првиот испорачан примерок се издвојува со двобојна конфигурација на надворешноста во нијансите Cote d’Azur и Titanium Silver, како и со ултратенка централна лента со препознатливите мотиви на Римац – краватата.

„The I.C.E. St. Moritz претставува сè она што го сакаме во автомобилската култура. Испораката на првата "Nevera R Founder’s Edition" токму на ова место совршено му прилега на автомобил кој на нашите купувачи им отвора подлабок увид во нашиот свет“, изјави Мате Римац.

Сопствениците на овие ексклузивни модели го започнуваат своето патување со лична конфигурација во "Rimac" Кампусот, заедно со Мате Римац и дизајнерскиот тим, а добиваат и ексклузивен пристап до седиштето на „Bugatti Rimac“, како и можност да влијаат врз развојот на идните модели.

Импресивни перформанси

"Nevera R" развива импресивни 2.107 коњски сили, забрзува од 0 до 100 км/ч за 1,81 секунда, од 0 до 200 км/ч за 4,38 секунди, а од 0 до 300 км/ч за само 8,66 секунди, со максимална брзина од 431,45 км/ч.

Во текот на 2025 година постави 24 светски рекорди и ја освои наградата „Red Dot“ за дизајн.