Кардиоваскуларните болести и понатаму се еден од водечките причини за смрт во светот, а во потрагата по превенција витаминот D сè повеќе доаѓа во фокус. Од наслови кои тврдат дека може значително да го намали ризикот од срцев удар, до оние кои целосно ги оспоруваат неговите придобивки, пораките за витаминот D и здравјето на срцето можат да делуваат збунувачки, пишува „The Hindustan Times“.

Д-р Кунал во видео на својот „Instagram“ профил објасни како витаминот D влијае на различни луѓе и зошто суплементацијата не делува исто кај сите кога станува збор за ризикот од срцеви заболувања.

Дали витаминот D го намалува ризикот од срцев удар?

Улогата на витаминот D во здравјето на срцето и превенцијата на кардиоваскуларните заболувања се проучува со години, но резултатите и понатаму не се доследни. Тој укажува на една неодамнешна студија која покажува зошто суплементацијата со витамин D не делува исто кај сите, истакнувајќи ја големата разновидност во индивидуалните реакции.

„Можеби сте виделе наслови дека витаминот D го преполовува ризикот од срцев удар, но деталите навистина се важни. Витаминот D со години се истражува во контекст на кардиоваскуларните заболувања, често со мешани резултати. Неодамнешен извештај на Американското здружение за срце помага да се објасни зошто клучниот заклучок не беше дека витаминот D делува кај сите – објасни тој.

Што откри студијата?

Д-р Суд истакнува дека во студијата мерливи придобивки биле забележани кај луѓе кои веќе имаат кардиоваскуларни заболувања и недостаток на витамин D. Кај лица со нормално ниво на витамин D не било забележано значително подобрување, што нагласува зошто суплементацијата не е универзално решение.

Лекарот објаснува:

– Придобивките беа забележани кај возрасни лица со веќе утврдено кардиоваскуларно заболување кои истовремено имале недостаток на витамин D и тоа само кога дозирањето било приспособено за да се зголемат и одржат соодветни нивоа во крвта. Во таа група ризикот од срцев удар бил значително понизок во споредба со луѓето кои останале со дефицит. Овој контекст е важен бидејќи многу претходни студии на витаминот D давале иста доза на сите, без оглед на почетното ниво. Ако нечие ниво веќе било доволно, дополнителниот внес не ги менувал резултатите, па затоа тие студии често покажуваат неутрални резултати. Значи, повеќе станува збор за препознавање на дефицитот и негово коригирање, особено кај лица со висок ризик.

Како витаминот D помага?

Според лекарот, витаминот D го поддржува здравјето на срцето така што помага во регулирање на воспалителните процеси, одржување здрава функција на крвните садови и управување со рамнотежата на калциумот, додавајќи дополнителен слој заштита на кардиоваскуларниот систем.

„Витаминот D има улога во регулирањето на воспалението, функцијата на крвните садови и контролата на нивото на калциум, а сето тоа може да влијае на здравјето на срцето. Ова сепак не ги заменува стандардните третмани за срцето ниту промените во животниот стил. Корекцијата на витаминот D може да се смета како потенцијален дополнителен слој за намалување на ризикот кај одредени лица, но не и како замена за докажаните методи на лекување – објасни д-р Суд.