Новиот комплет од серијата „Lego Icons“, наменета за возрасни љубители на коцките, се занимава со вистинска икона од автомобилскиот свет – реплика на легендарниот „Ford Model T". Сетот верно ја пресоздава естетиката на возилото од 1910-тите години, препознатливо по црната каросерија со златни детали и високите тркала со тенки бели гуми. Комплетот се состои од вкупно 1.060 делови и е насочен кон колекционери и љубители на историјата на автомобилите.

Напредна механика

Дизајнерите посветиле посебно внимание на функционалните елементи кои ги симулираат вистинските механизми на оригиналното возило. Моделот располага со препознатлив преклопен платнен покрив, преклопливо ветробранско стакло и патничка врата која се отвора само од едната страна. Внатрешноста нуди возачка кабина со верни детали и функционален управувач, додека со подигнување на седиштето се пристапува до симулиран резервоар за гориво.

Под хаубата, која може да се отвори од двете страни, се наоѓа детална реплика на погонскиот склоп. Специфичност на моделот е и „курбла“ рачката, чие вртење го активира вентилаторот на моторот, со што дополнително се нагласува интерактивноста на овој сет. Задниот багажник исто така е функционален и може да се отвори, што го прави моделот подеднакво атрактивен за изложување во дом или канцеларија.

Финалните димензии на составениот модел изнесуваат околу 20 сантиметри висина, 29 сантиметри должина и 13 сантиметри ширина. Покрај печатените упатства, корисниците можат да ја користат и апликацијата „LEGO Builder“, која овозможува 3Д-ротација, зумирање и дигитално следење на напредокот при составувањето.

Овој сет е позициониран како премиум производ во рамки на поширокиот спектар „Lego“ проекти дизајнирани првенствено за возрасни, а како таков ќе има и релативно висока цена од околу 130 евра. Во продажба ќе се појави кон средината на месецот.