Билетот кој на прв поглед изгледа евтино, може да стане значително поскап: Прогласени најлошите авиопревозници за 2026 година, 2 нискобуџетни доминираат

Ново истражување од британското здружение на потрошувачи „Which?“ покажа дека две популарни нискобуџетни авиокомпании се на самото дно на листата во однос на задоволството на патниците во 2026 година.

Зборуваме за компаниите „Ryanair“ и „Wizz Air“, кои добија најлоши оцени од патниците.

Иако многумина се привлечени од екстремно ниските почетни цени на билетите, патниците сè повеќе укажуваат дека конечниот износ што го плаќаат е значително поголем поради дополнителни трошоци. Таксите за багаж, изборот на седиште, осигурувањето или приоритетното качување честопати ја зголемуваат цената толку многу што ја надминува понудата на традиционалните превозници како што се „Lufthansa“ или „British Airways“.

„Ryanair“, според оцените на испитаниците, доби минимални поени за удобност.

Патниците ги опишаа кабините како неуредни, а седиштата како многу неудобни. Дополнително разочарување е лошата оцена на односот цена-квалитет, бидејќи, како што наведуваат, почетните заштеди исчезнуваат кога се вклучени сите додатоци.

Oд друга страна, „Wizz Air“ беше критикуван за лоша комуникација, особено во ситуации на доцнење на летови, а искуството со летање беше оценето од многумина како постојано непријатно.

Уредникот на списанието „Which? Travel“ истакнал дека нискобуџетните компании повеќе не се нужно најприфатливата опција, бидејќи превозниците кои првично го вклучуваат багажот во цената на билетот честопати на крајот се покажуваат како попрофитабилни.

На врвот на листата во однос на задоволството на патниците се компаниите кои нудат поцелосна услуга без скриени трошоци.

„Jet2.com“ беше прогласен за најдобар за летови на кратки релации, благодарение на фер третманот на патниците и транспарентните цени, додека „Singapore Airlines“ го освои првото место за летови на долги релации, особено за квалитетот на услугата и храната.

Заклучокот од истражувањето е јасен, билет кој на прв поглед изгледа исклучително евтин може да стане значително поскап кога ќе се вклучат сите дополнителни трошоци, па затоа на патниците им се препорачува внимателно да ја пресметаат вкупната цена на патувањето пред да купат.