Научниците во шумите на Западна Папуа откриле два вида цицачи за кои се верувало дека изумреле пред околу 6.000 години, што експертите го опишуваат како исклучително научно откритие.
Истражувачите пронашле мал опосум со по еден исклучително долг прст на секоја рака, како и вид летачка верверица со долг опаш, пренесе Би-би-си.
Резултатите од истражувањето се објавени во списанието „Australian Museum“ во публикацијата „Records of the Australian Museum“.
Научниците наведуваат дека ваквите откритија се познати како „Лазаров таксон“, термин инспириран од Лазар од Библијата, кој означува видови за кои се сметало дека се изумрени, но повторно се пронајдени.
Австралискиот научник Тим Фланери изјавил дека пронаоѓањето на еден ваков вид е исклучително ретко, додека откривањето на два вида е „навистина извонредно“.
Првото повторно откриено животно е џуџест опосум тежок околу 200 грама, чиј четврти прст на секоја шепа е двојно подолг од останатите, што му овозможува од дрвјата да извлекува ларви од инсекти, неговиот главен извор на храна.
Вториот вид е верверица, торбар, која живее во шуплини на високи дрвја и може да „лизга“ меѓу крошните.
Истражувачите дошле до откритието откако анализирале стари фосили, ретки фотографии и музејски примероци, а потоа посетиле оддалечени области на островот Нова Гвинеја.
Научниците соработувале со локални старешини од клановите Тамбрау и Мајбрат, чија помош била клучна за идентификацијата на видовите.
Според истражувачите, локалното население ја смета таа верверица за света и не ја лови, па дури ни не го изговара нејзиното име.
Научниците истакнуваат дека живеалиштето на овие животни е сè повеќе загрозено поради сечата на шумите во регионот, поради што научниците и организациите за заштита на природата настојуваат да обезбедат поголеми права за локалните заедници врз шумските подрачја, со цел да се спречи неконтролираната експлоатација.
