Сè повеќе докази покажуваат дека хроничниот стрес што го предизвикуваат „напорни“ и токсични луѓе може да го забрза биолошкото стареење — односно промените во телото што ја одразуваат состојбата на организмот и нивото на клеточно пропаѓање, а не нужно нечија вистинска возраст.

Како „проблематичните“ луѓе влијаат на нашето тело

Во извештајот што за списанието „Psychology Today“ го напишал д-р Себастијан Окленбург од Одделот за психологија при Медицинскиот факултет МSH во Хамбург се наведува дека „токсичните луѓе со своето однесување можат да предизвикаат голем стрес“. Во текстот се споменува и истражување за луѓе што научниците ги опишале како „проблематични“ — оние кои во нечие опкружување постојано создаваат проблеми или дополнително го засилуваат стресот.

Истражувачите откриле дека изложеноста на такви луѓе е поврзана со побрзо биолошко стареење. Секоја дополнителна проблематична личност во нечие опкружување се поврзува со околу 1,5 проценти побрзо стареење, односно со приближно девет месеци поголема биолошка возраст во споредба со луѓе со иста хронолошка возраст.

„Во просек, биолошката возраст на испитаниците кои во својата околина имале токсични луѓе била девет месеци повисока отколку кај луѓе со иста хронолошка возраст кои немале токсични пријатели или членови на семејството“, стои во извештајот. „Интересно е што токсичните членови на семејството или пријателите имале посилен ефект врз стареењето отколку токсичните сопружници“.

Држете се настрана

Главниот заклучок од истражувањето е дека луѓето треба „да се држат подалеку од токсичните“ луѓе. „Тие не само што ја нарушуваат менталната благосостојба и предизвикуваат фрустрација, туку и го забрзуваат стареењето и ги засилуваат воспалителните процеси во телото“, се предупредува во извештајот. „Тоа укажува дека за здраво стареење и општа благосостојба е исклучително важно да се намали контактот со токсични луѓе“.