Долгогодишната партнерка на Рики Џервејс, Џејн Фалон, била дијагностицирана со рак на дојка, објави „Пипл“.
Таа ги сподели своите здравствени вести во објава на Инстаграм вчера.
Во објавата, таа носи црна маица со зборовите „Мала вест…“ горе и „(Никој да не паничи)“ долу.
„Значи… помислив дека треба да објавам нешто бидејќи неколку луѓе забележаа дека сум малку тивка овде во последно време. Пред околу еден месец ми беше дијагностициран рак на дојка. За среќа, во многу рана фаза и прогнозата е одлична. Имав рутинска мамографија една недела пред Божиќ. Немав никакви симптоми, но брилијантниот радиолог забележа нешто сомнително и ме испрати на понатамошни тестови и на крајот на биопсија.
Оттогаш направив повеќе мамографии, повеќе биопсии и магнетна резонанца за да можат прецизно да ја одредат проблематичната област… Сето ова е премногу, нема да лажам“, напиша Фалон во описот.
Фалон продолжи велејќи дека ѝ е закажана операција за две недели, за да се реши проблемот, и дека посакува да може „сега да заврши со тоа“.
Таа, исто така, сподели фотографија од плишано мече кое носи син стетоскоп и лична карта на која пишуваше „Д-р Ерик“, како и фотографија од нејзината мачка, Пикл, во рачно нацртана виолетова униформа на медицинска сестра и етикета со име.
Во претходните објави таа се покажа како одмара со Пикл и ја промовира својата нова книга „Добредојдовте во соседството“, која беше објавена во јануари 2026 година.
Фалон е во врска со 64-годишниот Џервејс од 1982 година, откако се запознале на Универзитетскиот колеџ во Лондон. Оттогаш, двајцата си ги поддржуваат кариерите еден на друг.
Тој често ја припишува заслугата за инспирација за неговите различни проекти на Фалон.
Бидејќи се заедно толку долго, обожавателите често се прашуваат зошто никогаш не се венчале, за што и двајцата и претходно јавно зборувале.
Фалон во интервју за „Daily Mail“ во февруари 2018 година изјави дека ниту таа ниту Рики никогаш не му придавале големо значење на бракот. „Мислам дека веројатно би се венчале ако на некој од нас тоа навистина му беше важно, но никогаш не било нешто што ни требало на двајцата“, рекла таа.
Слично зборувал и Џервејс во интервју за „The Times“ во јануари 2010 година: „Ние во секоја важна смисла веќе сме како во брак. Сè делиме и нашиот ‘неофицијален брак’ трае подолго од многу вистински бракови. Не гледам смисла во церемонија пред Бог, бидејќи не верувам дека Бог постои.“
Рики Џервејс е британски комичар, актер, сценарист, режисер и продуцент, роден на 25 јуни 1961 година во Рединг во Велика Британија. Најпознат е како ко-креатор и ѕвезда на британската серија The Office (2001–2003), во која го толкуваше ликот на Дејвид Брент.
Тој ги создаде и сериите „Extras“, „Derek“ и „After Life“, а познат е по остриот и провокативен хумор, како и по успешната стенд-ап кариера. На пошироката публика ѝ е познат и како повеќекратен водител на доделувањето на „Golden Globe Awards“. Во текот на кариерата освоил големи телевизиски награди, вклучувајќи „Primetime Emmy Awards“ и „Golden Globe Awards“.
