Извршниот одбор на СДСМ донесе одлука да започне постапка за исклучување на поранешниот градоначалник на Скопје, Петре Шилегов, од членството на партијата. Од СДСМ тврдат дека Шилегов е „уценет“ и работи во интерес на ВМРО-ДПМНЕ, додека тој најавува платформа за внатрешни реформи и бара промени во раководството.
СДСМ иницира постапка за исклучување на Петре Шилегов од партијата. Извршниот одбор на опозицискиот Социјалдемократски сојуз на Македонија (СДСМ) донесе одлука да иницира постапка за исклучување на поранешниот градоначалник на Скопје, Петре Шилегов, од членството на партијата.
Одлуката, како што соопштија од СДСМ, следува по неговото гостување во емисијата „Тема на денот“ на телевизија Сител, каде што Шилегов изнесе критики кон актуелното раководство на партијата и најави дека поголема група социјалдемократи ќе побара оставка од сегашното раководство.
[Официјална објава на Фејсбук од страна на СДСМ]
Во партиското соопштение, СДСМ изнесе сериозни обвинувања на адреса на Шилегов, тврдејќи дека тој е „уценет“ и дека дејствува во интерес на владејачката партија ВМРО-ДПМНЕ.
„Шилегов е уценет и одработува за ВМРО. Ја разоткривме целата бизнис-шема на Христијан Мицкоски во енергетиката, од Адамовиќ во ‘Руднап‘. Сега на сите им е јасно зошто толку многу сакаат да го рушат СДСМ“, се наведува во соопштението.
Од партијата додаваат дека владејачката структура, според нив, се обидува да го дестабилизира СДСМ однатре, а најавената платформа на Шилегов ја оценуваат како обид за рушење на партијата.
Во интервјуто за ТВ Сител, Шилегов ги отфрли обвинувањата дека работи во корист на ВМРО-ДПМНЕ, нагласувајќи дека неговите активности се насочени исклучиво кон подобрување на состојбата во СДСМ.
Тој посочи дека во партијата постои сериозно незадоволство од начинот на кој се води организацијата и дека се подготвува иницијатива за внатрешни реформи.
„Процесот е активен. Ќе се обидеме да дојдеме до здрава политичка логика и да ги замолиме луѓето што ја раководат партијата тоа да не го прават повеќе. Да дојдат некои други луѓе да ја раководат партијата“, изјави Шилегов.
Тој најави дека јавноста нема да биде исклучена од процесот и дека наскоро ќе биде претставена платформа со која ќе се побараат сериозни реформи во рамки на партијата.
Според Шилегов, бројот на членови и функционери кои не се согласуваат со актуелното раководство е значително поголем отколку што се претставува во јавноста, а процесот на организирање веќе е започнат.
Денес
