„Google“ одлучи да ја укине претплатата за една од своите најкорисни функции во рамки на вештачката интелигенција "Gemini". Она што до вчера се наплаќаше, сега станува достапно за сите, а му овозможува на вашиот телефон буквално да ве познава во детали. Наместо роботски одговори, ќе добиете асистент кој ги знае вашиот распоред, плановите за патување и важните документи.
Вештачка интелигенција што повеќе не е „странец“
Главниот проблем со паметните уреди досега беше тоа што се однесуваат како странци кои не знаат ништо за вашиот приватен живот. Новата функција "Personal Intelligence" го менува тоа, бидејќи ѝ давате дозвола да „прелиста“ низ вашиот „Gmail“, документи и календар. На пример, можете само да прашате „Кога ми е следниот лет?“ или „За што пишував во оној документ вчера?“, и ќе добиете точен одговор за неколку секунди.
Безбедноста на прво место и целосна контрола
Иако звучи малку загрижувачки дека „Google“ „ги чита“ вашите приватни содржини, компанијата нагласува дека сè е целосно доброволно. Вие самите треба да ја активирате оваа опција во поставките и можете да ја исклучите кога сакате. Дополнително, од „Google“ тврдат дека вашите приватни фотографии и содржини од е-поштата не се користат за јавно тренирање на вештачката интелигенција, туку исклучиво за да ви се обезбеди подобра услуга.
Оваа промена најпрво се воведува во САД, но се очекува многу брзо да стане достапна и за корисниците во остатокот од светот. Функцијата ќе работи директно во „Google“ пребарувањето и прелистувачот „Chrome“, што значи дека вашиот дигитален асистент секогаш ќе ви биде на дофат. Засега се исклучени само деловните и училишните сметки, додека сите останати ќе можат да уживаат во бесплатен паметен асистент кој навистина го разбира нивниот живот.
