Адвокатот на Илон Маск во вторникот, на почетокот на судењето против „OpenAI“, изјави дека обвинетите ја поткопале неговата визија вештачката интелигенција да се користи за доброто на општеството и дека ги интересира само сопственото збогатување.
„Обвинетите во овој случај ја киднапирале добротворната организација, а ние бараме од вас да одговараат за тоа“, изјави адвокатот на Маск, Стивен Моло, пред поротниците во воведниот говор на федералниот суд во Оукланд, Калифорнија.
Маск го тужи „OpenAI“, како и неговите лидери Сем Алтман и Грег Брокман, тврдејќи дека го изневериле и него и јавноста со напуштањето на првичната мисија на компанијата која го создаде „ChatGPT“ – да биде контролор на вештачката интелигенција во служба на човештвото – и дека ја претвориле непрофитната организација во приватна компанија насочена кон профит. Адвокатот кој ги застапува обвинетите ќе го изнесе својот воведен говор подоцна истиот ден.
Маск, Алтман и Брокман присуствуваа на судењето. Маск, најбогатиот човек во светот, бара 150 милијарди долари отштета од „OpenAI“ и „Microsoft“, еден од неговите најголеми инвеститори, при што средствата би биле насочени кон хуманитарното крило на „OpenAI“.
Тој, исто така, бара „OpenAI“ повторно да стане непрофитна организација, како и Алтман и Брокман да бидат отстранети од нивните позиции.
Маск и Алтман заеднички го основаа „OpenAI“ во 2015 година со цел развој на вештачка интелигенција која ќе му помогне на човештвото и ќе конкурира на ривали како „Google“. „Тој ја разви стратегијата. Ги научи сè што знаат за градење бизнис“, изјави Моло. „Без Илон Маск, немаше да постои ’OpenAI‘“, додаде тој.
