Во египетскиот град Александрија археолозите откриле ретка кружна јавна бања од доцниот птолемејски период и римска вила со богати мозаици, што фрла нова светлина врз урбаниот развој на овој антички центар.
Како што соопшти Министерството за туризам и антиквитети на Египет, локалитетот во квартот Мухарам Бек бил откриен за време на заштитни ископувања што ги води Врховниот совет за антиквитети, пренесе „Аркео њуз“.
Посебно внимание привлекува кружната бања во форма на толос, архитектонски тип познат од грчката традиција, која датира од периодот на Птолемејската династија.
Вакви градби ретко се зачувани во Александрија и укажуваат на развиена и плански уредена градска средина.
Во непосредна близина се пронајдени остатоци од римска вила со подови украсени со мозаици изработени во неколку техники. Дел од мозаикот е составен од парчиња обоен камен, а остатокот е направен од ситни кубни камчиња, што сведочи за високиот животен стандард на урбаните елити во времето на Римското Царство.
Во вилата е пронајден и мал базен, кој бил поврзан со системот за водоснабдување.
Археолозите наведуваат дека наодите од Мухарам Бек ги пополнуваат празнините во разбирањето на југоисточниот дел на античка Александрија, град што го основал Александар Велики во 331 година пред нашата ера.
Покрај архитектурата, пронајдени се и бројни артефакти – монети, лампи, керамика и фрагменти од амфори, кои ги потврдуваат интензивните трговски врски на градот ширум Медитеранот. Откриени се и мермерни статуи поврзани со божества како Бахус и Асклепиј.
Експертите ја разгледуваат можноста дел од наодите да бидат изложени во Грчко-римскиот музеј во Александрија, додека истражувањата на локалитетот продолжуваат, пренесе Танјуг.
Денес
