Драма на аеродромот во Сплит – авион со 132 патници излета од пистата за време на подготовките за полетување кон Франкфурт. За среќа, нема повредени, а сите патници и членови на екипажот безбедно го напуштиле леталото.
Авион на компанијата „Кроација ерлајнс“ денеска излетал од пистата на аеродромот во Сплит при подготовките за полетување кон Франкфурт, јавуваат хрватските медиуми.
🚨 WATCH: Croatia Airlines Airbus A220-300 veers off the runway and ends up on the grass surface during an aborted take-off from Split Airport, Croatia.
— Breaking Aviation News & Videos (@aviationbrk) May 16, 2026
The aircraft sustained damage from colliding with a marker board and runway edge lights.
All passengers and crew members are… pic.twitter.com/dcNLUFmYru
Станува збор за Ербас А220 во кој имало 132 патници. Според првичните информации, авионот од засега непознати причини скршнал од пистата и завршил на тревната површина покрај неа.
При инцидентот биле оштетени вертикална ознака и светлата покрај пистата, но, за среќа, нема повредени меѓу патниците и екипажот.
Од аеродромот во Сплит информираа дека инцидентот се случил околу 13:30 часот, по што веднаш биле активирани надлежните служби.
„Кроација ерлајнс“ потврди дека сите патници безбедно го напуштиле авионот и се префрлени во зградата на аеродромот, каде што им била обезбедена поддршка за продолжување на патувањето.
Фото: Ivana Ivanovic/PIXSELL
Компанијата соопшти дека е во постојана координација со аеродромските служби и воздухопловните власти, додека причините за инцидентот ќе бидат познати по завршувањето на официјалната истрага.
За случајот се известени и Агенцијата за цивилно воздухопловство, како и Агенцијата за истражување несреќи.
