Познатиот шоумен и медиумска личност Бојан Јовановски, во јавноста попознат како Боки 13, објави дека неговиот дом во Скопје бил цел на провалници во текот на изминатата ноќ.
Јовановски преку социјалните мрежи информираше дека станал жртва на тешка кражба и провала, додавајќи дека во моментот кога се случил инцидентот не се наоѓал во државата, туку престојувал во Белград.
Според неговата изјава, настанот се случил во раните утрински часови, а поради тековната истрага засега не сака да открива дополнителни детали за случајот.
Од Министерството за внатрешни работи потврдија дека денеска била примена пријава за кражба во куќа во скопската населба Бардовци. Од полицијата информираат дека по пријавата службени лица излегле на терен, но сопственикот на објектот во тој момент не бил присутен.
Според информациите од МВР, увидот ќе биде извршен дополнително, по што се очекуваат повеќе детали за околностите под кои се случила кражбата.
Јовановски наведе дека веднаш по добиената информација тргнал кон Скопје и побара од јавноста да ја почитува неговата приватност додека трае истражната постапка.
Во моментов не е познато што точно било одземено од домот, ниту колкава е причинетата материјална штета. Надлежните институции работат на расчистување на случајот, а повеќе информации се очекуваат по завршувањето на увидот и понатамошната истрага.
