Министерот Тимчо Муцунски ќе учествува на 19. издание на Дубровник форум 2026, каде ќе се дискутира за европската безбедност, регионалната соработка и стратешките предизвици во регионот.
Министерот за надворешни работи и надворешна трговија, Тимчо Муцунски, утре и задутре ќе престојува во Дубровник, Република Хрватска, каде што ќе учествува на 19. издание на Дубровник форум.
Во рамки на Форумот, министерот Муцунски ќе биде говорник на панел-дискусијата „The EU and the Western Balkans: Resolving Unfinished Business Together“, посветена на европската интеграција на Западен Балкан, актуелните предизвици и можностите за продлабочување на соработката меѓу Европската Унија и земјите од регионот.
Под мотото „The Age of Multipolarity: Many Decisions, One Future“, Дубровник форум 2026 ќе собере високи државни претставници, креатори на политики, експерти и претставници на меѓународни организации, кои ќе дискутираат за најактуелните глобални и регионални безбедносни, политички и економски предизвици. Годинашното издание има и посебно симболично значење, бидејќи се одбележуваат 20 години од основањето на Форумот, претходно познат како Croatia Forum.
Имајќи предвид дека Република Хрватска во 2026 година претседава со Three Seas Initiative и MED9, годинашниот Форум ќе стави посебен акцент на медитеранската димензија на европската безбедност, регионалната соработка и заедничките стратешки предизвици.
За време на престојот во Дубровник, министерот Муцунски ќе оствари повеќе билатерални средби со свои хомолози и други високи претставници кои учествуваат на Форумот.
