Средбата на холивудските ѕвезди на натпреварот меѓу САД и Турција на Светското фудбалско првенство предизвика лавина реакции на социјалните мрежи, а особено внимание привлече Едвард Нортон, кого многумина го искористија за вирални шеги поврзани со филмот „Fight Club“.
Така фудбалот за момент падна во втор план поради случувањата на трибините. Додека репрезентациите играа важен меч на теренот, камерите и публиката често се вртеа кон ВИП-ложите, каде што се наоѓаа бројни познати личности.
Меѓу нив особено се издвоија Бред Пит и Едвард Нортон, чие заедничко појавување по подолго време веднаш го привлече вниманието на медиумите и обожавателите. Тие двајца претходно заедно глумеа во култниот филм „Fight Club“ од 1999 година, што дополнително го зголеми интересот на јавноста за нивната средба.
Набргу откако снимките од натпреварот се појавија на социјалните мрежи, почнаа да се шират мимови што потсетија на познатиот филмски пресврт, во кој ликот на Нортон всушност разговара сам со себе, бидејќи ликот на Пит е негово алтер его.
„Зошто Едвард Нортон зборува сам со себе“, „Не закрепнал од 1999 година“, „Едвард Нортон повторно се степа сам со себе“, „Продолжение на филмот ’Fight Club‘“, се само дел од коментарите.
Потоа следуваа и фотошопирани фотографии на кои Пит е избришан, како и снимка направена со вештачка интелигенција во која славните актери се тепаат во ВИП-ложата.
Потсетуваме, фудбалерите на Турција на стадионот СоФи во Инглвуд, во последното коло од групната фаза на Светското првенство, ја победија селекцијата на Соединетите Американски Држави со резултат 3:2.
Сепак, Американците со шест поени го обезбедија првото место во групата и го продолжуваат натпреварувањето во нокаут-фазата.
