Доналд Трамп тврди дека Иран го прекршил договорот со САД само еден час по постигнувањето, осудувајќи го нивниот напад со дрон врз брод и најавувајќи жестоки американски воени дејствија.
Американскиот претседател Доналд Трамп тврди дека САД и Иран вчера постигнале договор, но дека Техеран го прекршил само еден час подоцна со напад со дрон врз брод.
Во интервју за емисијата „Запознајте го печатот“ на американската телевизија Ен-би-си, Трамп изјави дека Иран се согласил на договор со кој, според него, се откажал од сите спорни прашања.
„Имавме состаноци со нив… тие вчера се согласија на договор – совршен договор за нас, без нуклеарно оружје, без ова, без она, без ништо. Се откажаа од сè. Потоа ја напуштија просторијата и за еден час лансираа дрон кон брод“, рече Трамп.
Тој додаде дека на иранските претставници им порачал дека нивниот потег е неприфатлив.
„Им реков: Вие луѓе сте болни. Вие сте болни луѓе“, изјави американскиот претседател.
Трамп потоа порача дека американската војска извршила жестоки напади врз Иран.
„Ги бомбардиравме жестоко минатата ноќ. Тие се многу, многу злобни и болни луѓе“, изјави тој.
Американскиот претседател повторно се осврна и на ситуацијата со Ормутскиот Теснец, нагласувајќи дека според информациите на американската војска, водниот пат останува отворен за комерцијален поморски сообраќај.
