Телефонот чини 299 долари, веќе е достапен за преднарачки, а првите испораки се очекуваат во април 2027 година.

Создаден за да ве одвикне од бескрајното скролање

Дизајнот на телефонот потсетува на легендарните телефони на преклоп од првата половина на 2000-тите години, како моделите „Motorola Razr“. Наместо екран чувствителен на допир, користи физичка „T9“ тастатура, каква што некогаш имаа телефоните на „Nokia“, „Motorola“ и „Sony Ericsson“.

Уредот работи со „LightOS“, поедноставена верзија на „Android“ која нуди само основни функции. На корисниците им се достапни повици, SMS-пораки, камера, календар, музички плеер и аларм, додека социјалните мрежи и интернетот се целосно изоставени.

Компанијата заедно со телефонот ја промовира и програмата за дигитален детокс „Flip Your Life“, која треба да им помогне на корисниците да се навикнат на живот со помалку време поминато со телефонот.

Сепак, не е целосно „глупав“ телефон

Иако фокусот е ставен на едноставноста, „Light Flip“ не е застарен уред. Тој има 2,8-инчен OLED екран, 6 GB RAM, 128 GB внатрешна меморија, камера од 50 MP и заменлива батерија со капацитет од 1.800 mAh.

Поддржува и современи технологии како „5G“, „Wi-Fi“, „Bluetooth“, „GPS“, а располага и со 3,5-милиметарски приклучок за слушалки, кој денес станува сè поредок кај паметните телефони.

Основачите на компанијата, Џо Холиер и Кајвеј Танг, за „ZDNet“ изјавија дека уредот не е наменет за постари корисници, туку првенствено за луѓе на возраст од 18 до 30 години, кои сакаат да избегаат од постојаните известувања и бескрајното скролање на содржини.

Според интерното истражување на компанијата, дури 52 проценти од припадниците на милениумската генерација и генерацијата Z би размислиле да користат поедноставен телефон за да го намалат времето што го поминуваат на социјалните мрежи.

Засега „Light Flip“ може да се резервира со депозит од 39 долари, а ќе се продава отклучен, по цена од 299 долари.