„Ветерот што дуваше со брзина од 100 километри на час стивна, но метеоролозите најавуваат пораст на температурите и повторно засилување на ветерот во следните два дена, што претставува директна опасност од избувнување нови пожари“, објаснува Павловиќ Стамениќ.

Таа наведува дека на островот Саламина неодамна животот го загубиле две лица во куќа која огнената стихија ја зафатила за само десет минути, пред да пристигнат пожарникарите. Со овие две жртви, вкупниот број на загинати се искачи на седум – по претходната смрт на тројца пожарникари на Крит и двајца членови на екипажот на хеликоптер.

Благодарение на брзата реакција на локалните служби, на Саламина биле повредени десет лица, но успешно биле евакуирани 600 луѓе, додека сите патни правци навреме биле пресечени за граѓаните со возилата да не влетаат во огнот.

„Две третини од земјата и понатаму се под жолт аларм, вклучувајќи ја Атика, дел од Централна Грција и целиот Пелопонез. Во последните десет дена избувнале 400 пожари, а од почетокот на сезоната дури 2700, што покажува колку е ризична ситуацијата и колку секојдневно можеме да очекуваме ново разгорување на огнот“, вели дописничката на „Politika“.

Таа нагласува дека екстремните климатски промени донеле и ненадејни поплави, како оние на југот на Пелопонез во областа Мани, каде што поројните води по пожарите предизвикале огромна материјална штета.

„Силата на водата беше толкава што буквално за пет минути автомобилите беа поплавени и однесени во морето. Многу е тешко да се предвиди и однапред да се биде подготвен за тоа што ќе се случи, бидејќи по пожарите многу често во Грција следуваа големи поплави кои предизвикуваа огромна материјална штета“, нагласува таа.

„Туризмот нема да трпи поради пожарите“

Зборувајќи за безбедноста на туристите, Павловиќ Стамениќ истакнува дека драмата на Халкидики успешно завршила и дека нема загрозени туристи.

Туризмот оваа година, како што наведува соговорничката, е нешто послаб во споредба со претходните сезони. Сепак, таа не смета дека пожарите можат да влијаат врз бројот на туристи во Грција.

„Луѓето нема да го откажат летувањето во Грција поради тоа, но мора да бидат подготвени, бидејќи, како што гледате, за само неколку минути можете буквално да се најдете во ситуација од плажа да тргнете во костим за капење, без пасош, без пари, без ништо, а сепак сето тоа не можете да го носите со себе на плажа“, истакна таа.

Клучна улога во спасувањето животи има системот 112, чии предупредувања и наредби за евакуација граѓаните и туристите мора строго да ги почитуваат, без да се обидуваат да се вратат во сместувањето по личните работи. Причините за пожарите често се човечки фактор и подметнување, поради што од почетокот на сезоната биле приведени 280 лица.