Просечната температура на морската површина надвор од поларните области достигна рекордни 21,1°C. Научниците предупредуваат дека дополнителното засилување на Ел Нињо би можело уште повеќе да ги загрее океаните и да поттикне екстремни временски појави.

Светските океани се потопли од кога било откако се вршат мерења, покажуваат најновите податоци на европската служба за климатски промени Коперникус.

Просечната температура на морската површина надвор од поларните области достигна 21,1°C, со што е надминат претходниот рекорд од 21,09°C, забележан во текот на три дена во март 2024 година.

Научниците особено ги загрижува тоа што рекордот е соборен во август, бидејќи температурата на светските мориња својот годишен максимум обично го достигнува во март или април, на крајот од летото на јужната хемисфера, пренесува „BBC“.

„Овој рекорд претставува уште еден јасен сигнал дека океаните се изложени на сè поголем притисок“, изјавила заменик директорката на Коперникус, Саманта Берџис.

Ел Нињо допрва треба да го достигне врвот

Дополнителна загриженост предизвикува фактот што природниот временски феномен Ел Нињо сè уште не го достигнал очекуваниот врв. Неговото засилување би требало да продолжи до Божиќ, а научниците предупредуваат дека би можел да стане еден од најсилните во последните неколку века.

Ел Нињо носи невообичаено топла вода во источниот и централниот дел на тропскиот Пацифик, што влијае врз зголемувањето на просечната температура низ целата планета.

„Фактот што веќе рушиме рекорди е ран показател за тоа колку силен станува Ел Нињо“, рекол Џереми Грист од Националниот центар за океанографија во Саутемптон.

Тој смета дека нов рекорд би можел да биде поставен уште во март или април 2027 година.

Потоплите океани носат поекстремно време

Научниците нагласуваат дека Ел Нињо не е единствената причина. Океаните апсорбираат повеќе од 90 отсто од вишокот топлина што ја задржуваат стакленичките гасови, создадени пред сè со согорување на фосилни горива.

Потоплите мориња можат дополнително да ги засилат бурите и топлотните бранови, да го забрзаат растот на нивото на морето и да го зголемат ризикот од поплави во крајбрежните области.

Високите температури на водата истовремено ги загрозуваат морските екосистеми, особено коралните гребени.