Компанијата „Adidas“ и Фудбалската федерација на Аргентина најавија специјален дрес посветен на Лионел Меси.
Еден од најдобрите фудбалери на сите времиња треба да го носи овој дрес на прошталниот натпревар против Бенин, на 6 октомври на стадионот Монументал.
Дизајнот на прошталниот дрес се разликува од стандардната аргентинска опрема. Основата е светлосина, додека по средината на дресот се протега широка бела лента.
На предната и задната страна се наоѓа мотивот на Сонцето, националниот симбол на Аргентина.
Наместо вообичаениот знак на германската компанија, на десната страна се наоѓа личното лого на Меси во форма на буквата „M“, извезено во златна боја, додека на левата страна е грбот на Аргентина со три ѕвезди, кој исто така е украсен со златни детали.
Меси го претстави дресот на социјалните мрежи со текст:
„Уште еден натпревар … Дрес за цел живот“.
Меси во текот на кариерата во дресот на репрезентацијата на Аргентина забележа 207 настапи и постигна 125 гола. Го освои Светското првенство во 2022 година, а двапати го крена и трофејот на Копа Америка, во 2021 и 2024 година.
Да потсетиме, соработката меѓу „Adidas“ и Меси трае од 2006 година. Колку таа била плодна говори и фактот што Аргентинецот во 2017 година потпиша доживотен договор со компанијата.
