Нафтените дамки годишно покриваат околу 1,58 милиони квадратни километри од светските океани, што е површина приближно трипати поголема од Шпанија, покажа новата сателитска анализа на непрофитната организација „SkyTruth“.
Повеќе од 90 отсто од проценетото загадување со нафта се случува во територијалните води на државите, често во близина на бреговите, вклучувајќи ги и заштитените морски подрачја, пренесува „Euronews“.
Бродовите најчести „виновници“
Најголемите концентрации на нафтени дамки се забележани во Црвеното Море, Персискиот Залив, Средоземното и Црното Море, како и во водите покрај бреговите на западна Африка и околу Индонезија.
Анализата, објавена на 23 септември за време на Неделата на климата во Њујорк, се базира на сателитски снимки собрани од 2023 до 2025 година и податоци од системот „Cerulean“ за следење на загадувањето со нафта.
Според наодите, бродовите се поврзани со околу 81 отсто од нафтените дамки кај кои било можно да се утврди потенцијалниот извор, при што најчесто биле вклучени танкери и товарни бродови.
Нафтената и гасната инфраструктура на море била поврзана со уште околу 18 отсто од забележаните дамки.
„Постојан глобален проблем“
Истражувачите повеќепати забележале 16 исти пловила во близина на нафтени дамки, додека некои постројки на море, исто така, повеќепати биле поврзувани со загадување.
„Загадувањето со нафта е постојан глобален проблем кој се случува многу почесто отколку што покажуваат големите инциденти за кои се известува“, изјави Карл Вустер, главен директор за технологија во организацијата „SkyTruth“.
Иако концентрациите на нафтени дамки во околу 75 отсто од заштитените морски подрачја биле помали отколку во околните води, загадување е регистрирано и во чувствителни живеалишта, вклучувајќи го и подрачјето во Мексиканскиот Залив во кое живее критично загрозениот Рајсов кит.
Вистинските размери се уште поголеми?
Истражувачите предупредуваат дека вистинските размери на загадувањето би можеле да бидат и поголеми, бидејќи сателитското следење е ограничено на отворено море.
На океаните им се закануваат и војните, несреќите и потонатите бродови.
Се проценува дека на морското дно лежат околу 8.500 потенцијално загадувачки бродски остатоци, главно од двете светски војни, од кои некои веќе испуштаат нафта поради корозија на трупот.
