Горниот дом на парламентот на Швајцарија денеска изгласа воведување такса од најмалку 2.000 франци за доселување работна сила од Европската Унија, која би се активирала во рамките на новата заштитна клаузула предвидена со новиот пакет договори со ЕУ.
Предвидено е таксата за вработените да се наплаќа директно од компаниите што ги ангажираат, додека полнолетните членови на семејствата кои доаѓаат во рамки на спојувањето на семејството самите би ги сноселе трошоците.
Законодавците предлагаат минималниот износ на таксата да биде меѓу 2.000 и 4.000 франци, а собраните приходи би им биле прераспределени на граѓаните на Швајцарија.
По активирањето на клаузулата, таксата би се применувала и на државјани на трети земји. Оваа мерка стапува во сила во случај Швајцарија да забележи сериозни економски или социјални проблеми поради високиот прилив на доселеници.
Според усвоениот предлог, Федералниот совет (Владата) ќе биде должен секоја година да ја анализира потребата од активирање на заштитната клаузула, се наведува на веб-страницата на швајцарскиот парламент.
Предлагачите на оваа мерка оценуваат дека таксата би требало да ги поттикне швајцарските компании повеќе да вработуваат домашни работници, пренесува „Swissinfo“.
Сепак, одредени политичари од десниот центар од франкофонскиот дел на Швајцарија изразија сомнежи во нејзините ефекти и предупредија на дополнителната администрација, како и дел од левицата.
