Арнолд Шварценегер и „Hummer“ се нераскинливо поврзани, а за тоа постои добра причина. Благодарение на славниот актер и неговиот интерес за воени возила, моќниот американски теренец станал достапен и за цивилните купувачи.

Кон крајот на седумдесеттите години, американската војска барала замена за застарената флота теренци „Jeep“, а решението било пронајдено во возилото „HMMWV“, попознато како „Humvee“.

Производството го презел „AM General“, а возилото почнало да се користи во 1984 година.

Шварценегер се заинтересирал за „Humvee“ во 1990 година, за време на снимањето на филмот „Полицаец од градинка“, кога видел колона од овие воени возила.

Актерот бил толку воодушевен што ја искористил својата популарност за да го убеди производителот да му продаде еден примерок.

„Hummer H1“: Воен теренец за цивилни купувачи

Интересот на Шварценегер помогнал да се развие цивилна верзија на возилото, наречена „Hummer H1“. Првиот примерок му припаднал токму нему.

„H1“ ги задржал основната конструкција и механиката на воениот модел „Humvee“, но добил опрема приспособена за секојдневно возење, вклучувајќи функционална инструмент-табла, клима-уред и тапацирани седишта.

Во текот на 14-те години производство, „Hummer H1“ бил понуден со различни V8-мотори со зафатнина од 5,7 до 6,6 литри. Најмоќните верзии развивале околу 300 КС.

Поради масата поголема од три тони и робусната конструкција, ова возило било значително поблиску до воена машина отколку до класичен СУВ-модел.

Гаражата на Шварценегер полна со автомобилски легенди

Не е познато кои сè автомобили моментално се наоѓаат во гаражата на Шварценегер, но актерот претходно бил забележан во Лос Анџелес зад воланот на „Hummer H1“ без врати.

Според достапните извештаи, неговата колекција ги опфаќа и „Porsche 911 Turbo Cabriolet“ од генерацијата 997, „Bentley Continental“, „Audi R8“ и „Mercedes-Benz SLS AMG Roadster“.

Меѓу возилата наводно се наоѓа и тенк „M47 Patton“.

Колекцијата на Шварценегер покажува дека неговиот вкус не познава граници меѓу луксузните спортски автомобили и тешките воени возила.

Сепак, токму „Hummer H1“ останал еден од моделите што најмногу се поврзуваат со неговото име.