Според пишувањата на странските медиуми, тој се крие од полицијата во тунелите под Лас Вегас, а на социјалните мрежи објавува вознемирувачки видеоснимки во кои зборува за своето семејство, вклучително и за сопругот на неговата сестра, прославениот тенисер Андре Агаси.

Додека Штефи веќе со години води повлечен семеен живот со својот сопруг Андре, нејзиниот помлад брат Михаел повторно се најде во центарот на вниманието, но поради причини кои немаат никаква врска со спортот.

Како што пишува „СпортБајбл“ (SportBible), 55-годишниот Михаел на Фејсбук објавил серија видеоснимки во кои тврди дека се крие од полицијата во подземните тунели на Лас Вегас. На снимките изгледа запуштено, седи пред ѕид покриен со графити и зборува за своите проблеми.

Во заднината на една од снимките може да се забележи и количка за пазарување, за која се претпоставува дека ја користи за чување на своите лични работи.

Полицијата издала налог за негово апсење

Проблемите на Михаел со законот траат веќе извесно време. Според достапните информации, на 12 март бил уапсен во Болдер Сити поради возење под дејство на алкохол или други опојни супстанции.

Во Невада, на 26 март бил издаден судски налог за негово апсење, откако не се појавил на судско рочиште. „СпортБајбл“ наведува и постапка поврзана со прекршување на судските услови во случај на неовластено влегување на туѓ имот.

Не е познато колку долго Михаел престојува во тунелите. Претходно се пишувало дека живеел во шатор во областа на езерото Мид, недалеку од Лас Вегас.

Тунелите во кои, според сопствените тврдења, се крие, биле изградени како систем за заштита од поројни поплави и за одводнување, но со текот на времето станале и засолниште за голем број бездомници.

Во своите објави, Михаел се осврнал и на односот со Андре Агаси, сопругот на неговата сестра Штефи.

Тој се присетил на физичка пресметка што, според неговите зборови, ја имале во минатото. Во една од снимките тврдел дека Агаси го удирал многу силно, но притоа ја признал и сопствената улога во конфликтот.

„Мислам, тоа е разбирливо. Постојано го провоцирав“, изјавил Михаел, а потоа опишал како и самиот го удрил Агаси.

Неговите тврдења засега не се независно потврдени, а нема ниту јавно достапна реакција од Агаси на овие изјави.

Штефи со години се обидувала да му помогне

Михаел се преселил во Лас Вегас со своите деца околу 2001 година, во периодот кога таму се населиле и Штефи Граф и Андре Агаси.

Неговите проблеми не се ништо ново за семејството. Според пишувањата на „СпортБајбл“, Штефи со години се обидувала да му помогне на својот помлад брат, вклучително и со плаќање адвокати и купување куќа.

Наводно, се обидувала и да добие законско старателство над него, а му пружала поддршка и по апсењето поврзано со насилен инцидент во 2020 година.

И покрај нејзините напори, Михаел повторно се нашол во сериозни проблеми.

Една од најдобрите тенисерки на сите времиња

Штефи остана запаметена како една од најуспешните тенисерки во историјата. Во текот на својата кариера освоила 22 гренд слем титули во поединечна конкуренција, а во 1988 година постигнала подвиг кој до денес останува единствен во тенисот во поединечна конкуренција.

Таа година ги освоила сите четири гренслем-турнири и златниот олимписки медал, со што го остварила таканаречениот Златен слем.

На врвот на светската ранг-листа поминала вкупно 377 недели, што и понатаму претставува рекорд во женскиот тенис.

По завршувањето на кариерата, главно се повлекла од јавноста и со својот сопруг Андре изградила семеен живот далеку од постојаното медиумско внимание.

Најновите проблеми на нејзиниот брат, меѓутоа, повторно го насочија вниманието на помалку познатата и значително потешка страна од животот на нејзиното семејство.