Разбиени се повеќедецениските гласини, а со помош на специјална програма е дешифриран заматениот текст од култниот класик на „Nintendo“.
Јутјубер тврди дека конечно решил една од најголемите мистерии во играта „Super Mario 64“, речиси 30 години по нејзиното излегување, потенцијално ставајќи им крај на повеќедецениските гласини за Луиџи.
Објавена во 1996 година, играта „Super Mario 64“ остана извор на тајни и теории на обожавателите, а играчите и децении подоцна продолжуваат да доаѓаат до нови сознанија.
Една од нејзините најпознати мистерии се однесува на мала плоча под статуата на ѕвезда во дворот на замокот на принцезата Пич. Заматениот текст долго се толкуваше како „L is real 2401“ („Луиџи е реален 2401“), што поттикна теории дека во овој класик за „Nintendo 64“ тајно можело да се игра со Луиџи или дека станува збор за текст останат од периодот кога било планирано ликот да биде вклучен, пред да се откажат од таа идеја.
Меѓутоа, јутјуберот „mochi64“ верува дека конечно ја пробил шифрата и дека вистинската порака нема никаква врска со братот на Марио.
Во видеоснимка на „YouTube“, „mochi64“ објаснил дека текстурата на плочата има само 32 × 32 пиксели, поради што буквите е речиси невозможно да се дешифрираат со голо око.
Наместо да се обиде да ја подобри заматената слика, авторот создал програма осмислена да го пресоздаде начинот на кој уметник на „Nintendo“ би ја изработил таа текстура во 1996 година.
Процесот вклучувал тестирање на околу 530 фонтови, заедно со милиони комбинации на зборови, растојанија меѓу буквите, димензии на сликите и техники за промена на големината, за да се утврди што дава најсличен резултат.
Откако изборот бил стеснет на верзијата на фонтот „Palatino Bold Italic“ на „Adobe“ од 1990 година, програмата го идентификувала она што „mochi64“ го смета за вистинскиот натпис: „Eternal Star. We hope so“ („Вечна ѕвезда. Се надеваме“).
Првиот ред од текстот бил утврден по тестирање на повеќе од 27.000 зборови, додека посебно пребарување, кое опфатило над 17.000 англиски зборови, ја идентификувало фразата „We hope so“ како најдобро совпаѓање за вториот ред.
Според авторот, познатата теорија „L is real 2401“ покажала приближно двојно полошо совпаѓање со оригиналната текстура.
Ова откритие конечно би можело да им стави крај на шпекулациите дека плочата содржела упатства за отклучување на Луиџи, иако братот на Марио навистина требало да се појави во „Super Mario 64“.
Всушност, Шигеру Мијамото претходно потврдил дека Луиџи првично бил вклучен во играта како дел од планираниот режим за повеќе играчи, но бил отстранет поради мемориски ограничувања.
„mochi64“ ги објавил и кодот на проектот, податоците и извештајот од 40 страници на „GitHub“, овозможувајќи им на другите играчи самостојно да ги проверат сознанијата.
Иако „Nintendo“ сè уште официјално не го потврдил овој натпис, откритието е уште еден пример за тоа како обожавателите продолжуваат да откриваат тајни во игра стара речиси 30 години.
Во 2025 година, друг јутјубер открил скриен звучен ефект во „Super Mario 64“, за чие целосно репродуцирање се потребни 14 месеци.
Неодамна, еден програмер дури успеал да ја стартува „Super Mario 64“ на оригиналниот хардвер на „SNES“, речиси три децении откако оваа игра помогна да се дефинира жанрот на 3Д-платформските игри.
