Двајца вработени во енергетскиот сектор загинаа во два одделни напада со дронови во областа Запорожје во Украина, соопшти Меѓународната агенција за атомска енергија (МААЕ). Едниот бил вработен во нуклеарната централа Запорожје, а другиот во блиската термоцентрала.

Како што пренесуваат „Ројтерс“ и „Гардијан“, двата напада се случиле во понеделник, на 9 ноември. Во првичните извештаи не се наведени точниот час на нападите и кој ги извршил.

Нуклеарната централа Запорожје, архивска фотографија од 2015 година. Фото: DENAMAX / Wikimedia Commons (CC BY-SA 4.0).

Нуклеарната централа Запорожје се наоѓа во југоисточна Украина, во близина на фронтот. Руските сили ја презедоа контролата врз неа во првите недели од инвазијата во 2022 година. Со шест реактори, таа е најголемата нуклеарна централа во Европа.

Термоцентралата Запорожје, архивска фотографија од 2019 година. Фото: Ігор Діклевич / Wikimedia Commons (CC BY-SA 4.0).

Зошто централата и понатаму зависи од струја

Нуклеарната централа не произведува електрична енергија, но и понатаму ѝ е потребна струја за ладење на нуклеарното гориво. Во неделата, на 8 ноември, централата останала без надворешно напојување и неколку часа се потпирала на резервни генератори, пред напојувањето да биде обновено, објави „Ројтерс“, повикувајќи се на МААЕ.

Според агенцијата, тоа било 27. прекин на надворешното напојување од почетокот на војната. За понеделничките напади, првичните извештаи се однесуваат на загинатите работници и не наведуваат последици за работата на нуклеарната централа.