Ги сакаш ли зимските спортови и зимата воопшто?

- Да,го сакам скијањето. Убава ми е зимата на планина. Сите пејсажи на зимската белина ми се многу убави. Убава енергија ми дава, ми ги полни батериите, чист воздух. Убави се и прошетките кога крцка снегот под нозете. Зимската идила иако ладно, има своја драж,потсетува на топлина амбиент со камин,чаша вино...

Кога застана првпат на скии?

- Првпат застанав на скии на 9 години на Маврово.

Незгодни случки, паѓања?

- Секако дека имаше паѓање, но не се сеќавам толку на тој период. Повеќе се сеќавам кога имав 16 години почнав да скијам на сноуборд. Тогаш баш имаше паѓања. Еднаш на Шар Планина на Церепашина стазата паднав во провалија, а веќе беше доцна, не баш пријатно искуство. Ме спасија, се се заврши добро пред вистински да се стемни.

Омилени патеки?

- Омилени патеки, плави, црвени. Сакам адреналин но и лежерност, скијам за задоволство, со уживање, а не за да сум под тензија, затоа на црни стази не скијам.

Беше ли на скијање, каде и со кого?

- Да скоро се вративме. Со децата бевме на Копаоник во Србија. 

Скијаат ли децата?

- Андреј не му беше прво застанување на скии имаше пробано предходно во Маврово, а Јована прв пат застана на скии оваа година. Скијаа со инструктор и со мене заедно. Со Јована на Караман, а со Андреј и на Панчичев врв скијавме.

Најубав зимски одмор?

- Баш овој сега зимски одмор можам да кажам дека ние еден од најубавите зимски одмори. Вистински уживавме во овој зимски одмор. Бидејќи децата подпораснати, па сите заедно тројцата можевме се заедно, да скијаме, да шетаме, да одиме во теретана, на базен, ресторан, кафе бар. И децата разбираат многу повеќе сега, беа многу среќни, задоволни, возбудени цел зимски одмор.

Покрај скијање уживавте ли во СПА?

- Копаоник како ски центар нуди навистина се за сите возрасти,во околината има повеќе бањи, покрај скијањето, спа центри, ресторани ,кафичи, за деца игротеки на снег, преку ден, а и навечер и за големи и за мали. Секогаш има нешто што би можело да се прави. Копаоник е прекрасен ски центар.

(А.В.)