Неверојатната снимка е направена за првпат во историјата и ги воодушеви сите љубители на природата и животните.
Речиси 700 царски пингвини се снимени како нуркаат во студените води на Антарктикот за првпат, скокајќи од застрашувачка ледена карпа висока 15 метри.
Неверојатниот скок се смета за клучен обред на премин за младите пингвини, што го означува нивното прво пливање откако нивните родители веќе биле во морето, велат експертите.
Видеото, на кое се гледа момент кој досега не е снимен на камера, ќе биде дел од претстојната документарна серија наречена „Тајните на пингвините“.
Децата на царските пингвини обично првпат пливаат на возраст од околу шест месеци. Тие се собираат заедно во големи групи и скокаат од височина од само неколку метри во океанот или едноставно се лизгаат во водата од снегот. Меѓутоа, на драматичната снимка која неодамна ја снимил истражувачот на „National Geographic“, Берти Грегори, околу 700 бебиња пингвини се нашле на опасна локација и биле видени како скокаат од ледената карпа.
Берти кампуваше на Антарктичкиот Полуостров следејќи јато бебиња пингвини околу два месеци пред да го види неверојатниот момент преку објективот на неговата камера.
„Обично тие скокаат од морскиот мраз кој е висок еден или два метра, но забележав дека оваа група се движи кон друго место. Затоа летав таму со дрон за да видам што се случува и сфатив дека се собираат на работ на огромна ледена карпа од 15 метри“, додаде тој.
Дронот на Берти ја сними сцената на пингвините кои ѕиркаат од работ на карпата и колебливо гледаат надолу во океанот што поканува. Конечно, еден храбар пингвин ја презеде контролата и храбро скокна во водата долу.
„Еден по еден почнаа да скокаат од оваа ледена карпа за првпат да запливаат во Јужниот Океан“, рече Берти.
„Не можам да верувам дека го фатија овој момент на камера“, вели биологот Мишел ЛаРу.
Мишел останува надежна и верува дека способноста на царските пингвини да се прилагодат може да им помогне да се справат со климатските промени што се случуваат на Антарктикот.
„Тие се неверојатно еластични“, рече таа. „Тие постојат милиони години, виделе многу различни промени во нивната околина. Прашањето е колку брзо можат да се справат со промените што се случуваат“, рече таа.
