Положбата за спиење е исклучително важна за секој од нас и често е речиси невозможно да заспиеме ако не спиеме на вообичаен начин за нас. Меѓутоа, доколку преферирате да спиете на страна, треба да размислите на која страна треба да и дадете приоритет, пишува „Well+Good“, а пренесува „Sensa.hr“.

Поставувањето на телото во оптимална положба додека спиете на страна помага да се намали болката во ’рбетот, а дури е познато дека спиењето на страна го фаворизира отворањето на дишните патишта и може да го реши проблемот со ’рчењето.

Интересно е тоа што спиењето на страна влијае и на варењето, но и на здравјето на срцето, а особено изразен ефект врз овие две категории ќе има страната на која спиете.

И покрај потенцијалните придобивки, спиењето на страна исто така може да предизвика непријатност, како што се болки во рамото или колкот, особено ако не е правилно поддржано со перници или душек.

На која страна да спиеме?

Всушност, не постои само еден точен одговор на ова прашање, туку зависи од вашата здравствена состојба. Спиењето на страна има ефект врз гастроинтестиналниот и кардиоваскуларниот систем, па може да влијае на здравјето на желудникот и срцето.

Левата страна е посоодветна за одржување на здравјето на желудникот, особено ако страдате од рефлукс на киселина. Исто така, постојат научни докази кои потврдуваат дека приоритет треба да се даде на левата страна за време на бременоста бидејќи го подобрува протокот на крв кај мајката и бебето.

Десната страна е подобра опција за вас доколку имате кардиоваскуларни проблеми. Сепак, нема докази дека спиењето на оваа страна може да помогне во одржувањето на здравјето на срцето или да ги спречи проблемите однапред.

Оптималната положба за спиење е онаа најкомфорната

Има многу истражувања кои го поддржуваат спиењето на страна наместо спиењето на грб или стомак доколку сакате да го оптимизирате дишењето ноќе, да го ублажите ’рчењето, да намалите одредени болки и да го подобрите варењето. Меѓутоа, освен ако немате специфичен здравствен проблем кој строго диктира одредена положба за спиење, не треба да бидете строго фокусирани на тоа.

Експертите се согласуваат дека квалитетот на вашиот сон е многу поважен за одржување на целокупното здравје отколку вашата положба на спиење. Тоа значи дека најдобрата поза за спиење е веројатно онаа во која најлесно и најубаво ќе заспиете.