Apple се согласи да плати 95 милиони долари за да се реши колективната тужба во која се тврди дека нејзиниот гласовен асистент Siri тајно ги снимал приватните разговори на корисниците.

Овие „случајни“ активирања предизвикаа бурни реакции, при што корисниците беа особено вознемирени кога забележаа насочени реклами поврзани со темите за кои само разговарале.

Обвинителите тврдат дека случаите на ненамерно активирање на Siri се евидентирани од 2014 година, кога за прв пат беше воведена функцијата „Hey Siri“. Гласовниот асистент често се активирал и почнувал да снима без јасна команда, што главно се случувало со подигнување на Apple Watch или со препознавање говор во позадина.

Особено вознемирувачки се тврдењата дека на снимките имало приватни разговори меѓу лекари и пациенти, деловни зделки, па дури и можни криминални активности. Дополнително, податоците како локација, контакти и апликации ја зголемија загриженоста на корисниците.

Надомест за корисниците

Судските документи наведуваат дека сите корисници кои купиле уреди со Siri помеѓу 2014 и 2024 година ќе имаат право на компензација до 20 долари по уред, со најмногу пет уреди по корисник.

Подобни уреди вклучуваат iPhone, iPad, Apple Watch, MacBook, HomePod и повеќе. Одлуката за одобрување на спогодбата се очекува на 14 февруари.

Дали Apple помина премногу лесно?

Иако многумина веруваат дека спогодбата носи дел од правдата, некои сметаат дека Apple поминал лесно. Според Законот за прислушување, компанијата можеше да се соочи со казни од над 1,5 милијарди долари.

Адвокатите на корисниците се согласија на спогодба за да се избегнат несигурности поврзани со понатамошни судски спорови, но нагласија дека проценетата штета е значително поголема.

Случајот покренува пошироки прашања за приватноста во дигиталната ера, при што слични тужби се поднесени против други технолошки компании. Гугл, на пример, моментално се соочува со слични судски спорови за неговиот гласовен асистент, што покажува дека податоците на корисниците сè повеќе се предмет на злоупотреба во технолошката индустрија.

Колку се безбедни нашите разговори?

Случајот отвора пошироки дилеми за тоа колку навистина се безбедни приватните разговори во светот на паметните уреди.