"Komatsu", глобален производител на тешка опрема (и главен спонзор на тимот на Вилијамс Рејсинг Формула 1), ја претстави следната генерација подводен булдожер на "CES 2025".
Ова беше прво појавување на компанијата на "CES" и важно е да се спомене дека деби-производот не беше само концепт, туку целосно функционален електричен автономен прототип.
Како што пренесува веб-страницата „Interesting Engineering“, подводниот електричен булдожер има капацитет на батерија од 450 kWh и време на полнење од четири часа. Сепак, батеријата потенцијално може да се зголеми на 500 kWh, што би му овозможило на подводното електрично возило да работи до шест часа.
Во моментов, амфибискиот булдожер може да нурне само до длабочина од седум метри поради ограничувањата на "GPS", но "Komatsu" планира да ја зголеми работната длабочина на 50 метри.,
"Komatsu" всушност го претстави својот прв подводен булдожер во 1970 година. Следната година, "D155V" влезе во масовно производство како прв амфибиски булдожер во светот и оттогаш се користи на повеќе од 1.200 проектни локации низ Јапонија.
Покрај секојдневните градежни потреби, како што се крајбрежни градежни проекти за ублажување на штетите од невремето, подводниот булдожер се користи и за одржување на реките и бреговите, односно за давање поддршка на пристаништата и се користи за работи за намалување на ризикот од поплави, како и за помош во напори за обновување на екосистемот.
