Украинскиот претседател Володимир Зеленски изјави дека е подготвен лично да отиде во Истанбул в четврток на средба со рускиот претседател Владимир Путин за да разговараат за крајот на војната.
Неговата објава дојде кратко откако американскиот претседател Доналд Трамп побара од Украина да се согласи со понудата на Путин за директни разговори меѓу двете земји во Турција.
Пресврт во украинскиот став
„Нема смисла убиствата да продолжат. И ќе го чекам Путин во Турција в четврток. Лично“, напиша Зеленски.
Тој претходно изјави дека Украина е отворена за преговори со Русија, но само откако ќе стапи на сила прекинот на огнот.
Западните сили повикаа на 30-дневен прекин на огнот, кој би започнал в понеделник, по состанокот на европските лидери во Киев кои ја предводат т.н. „коалиција на добронамерните“. Понудата на Путин за директни преговори дојде по таа средба.
Трамп ги поддржува директните преговори
Трамп попладнево на социјалните мрежи објави дека Украина треба „веднаш да се согласи“ на овие преговори бидејќи тоа би покажало дали воопшто постои начин да се стави крај на војната.
„Барем ќе можат да утврдат дали е можен договор. А ако не, европските лидери и САД ќе знаат каде стојат и ќе можат да дејствуваат соодветно“, рече Трамп.
Американскиот претседател исто така напиша дека се сомнева дали е воопшто можен договор со Путин, но истовремено порача: „ОДРЖЕТЕ ГО ТОЈ СОСТАНОК, СЕГА!!!“.
