Новата градба во Балнеарио Камбориу, Бразил, ќе ја надмине „Central Park Tower“ во Њујорк како највисока станбена зграда во светот, а најевтиниот стан во неа ќе чини 5 милиони долари.
Кулата Сена (Senna Tower), за која се вели дека е инспирирана од животот на легендата на Формула 1 Аиртон Сена, ќе биде изградена над луксузното бразилско крајбрежно одморалиште Балнеарио Камбориу, издигнувајќи се повеќе од 550 метри во воздух – малку повисока од „One World Trade Center“ во Њујорк.
Инвеститорите на проектот со 154 ката неодамна открија нови цени за најексклузивните резиденции во кулата, пренесе „Њузфлеш“, а бројките се неверојатни.
Скапоцениот комплекс ќе биде комплетиран со два трикатни пентхауси, секој со цена од неверојатни 53 милиони долари. Новите цени претставуваат драматичен скок во однос на првичната процена од 15,92 милиони долари. Нив наводно ќе ги продава британската аукциска куќа „Sotheby’s“.
Инаку внуката на Сена, уметницата Лалали Сена, помогнала во дизајнирањето на кулата, за која се вели дека го симболизира патувањето на иконата на мотоспортот низ надминувањето на предизвиците.
Кулата Сена се гради за да содржи вкупно 228 единици, вклучувајќи 204 станови, а дури и најмалите резиденции во кулата ќе чинат близу 5 милиони долари.
Проектот е резултат на соработка помеѓу градежната компанија „ФГ Емпрендиментос“, семејството Сена и бразилскиот трговец Хаван. Проценетата инвестиција изнесува повеќе од 525 милиони долари.
Се очекува изградбата да биде завршена до 2033 година.
