Многу пациенти заболени од рак на дебелото црево се прашуваат како да ја задржат болеста под контрола по завршувањето на хемотерапијата. Сега, едно клучно истражување нуди убедлив одговор: структурирана физичка активност, внимателно следена и поддржана, може значително да го продолжи животот.

Физичката активност со изненадувачки резултати

Професорот по биомедицински науки на британскиот универзитет Англија Раскин, Џастин Стибинг, во анализа за "The Conversation" ги истакнува резултатите од меѓународното истражување "CHALLENGE", рандомизирана контролирана студија објавена во "New England Journal of Medicine" и претставена на годишниот состанок на Американското здружение за клиничка онкологија во Чикаго.

Во истражувањето учествувале 889 пациенти со рак на дебелото црево од шест земји. Едната група добивала стандардна нега по хемотерапијата, додека другата учествувала во тригодишна програма со менторство, што вклучувала персонализирани планови за вежбање и редовни средби со фитнес-тренери. Резултатите биле впечатливи: вежбањето го намалило враќањето на болеста за 28%, а смртноста за 37%.

Според Стибинг, 90% од оние што вежбале останале без рак по пет години, во споредба со само 74% од оние што не вежбале.

Доследноста е клучна

Учесниците од групата што вежбала најчесто пешачеле брзо по 45 минути, четири пати неделно. Почнувале полека, со поддршка од редовни средби со тренери на секои две недели, а подоцна месечно. Оваа постојана поддршка се покажала како клучна за долгорочна доследност.

Иако повредите биле нешто почести кај групата што вежбала (19% спрема 12%), научниците ги оцениле како управливи и незначајни во споредба со големите придобивки за преживување.

Стибинг го нарекува ова истражување прв силен доказ дека физичката активност не само што корелира со подобри исходи, туку директно ги подобрува стапките на преживување кај пациентите со рак.

Јасен пат напред

Додека научниците продолжуваат да го истражуваат влијанието на вежбањето врз инсулинскиот одговор, воспаленијата и имунолошката функција, примероците од крв собрани во "CHALLENGE" би можеле во иднина да водат кон индивидуализирани вежбачки третмани.

Сè додека не стигнеме таму, Стибинг нагласува една суштинска порака:

Движењето е важно — но вистинската форма и вистинската доза прават целосна разлика.