Синоќа во Белата куќа во Вашингтон се одржа средба меѓу Трамп и Зеленски, на која присуствуваа и европските лидери, меѓу нив и премиерката на Италија Џорџа Мелони. Нејзиното однесување за време на состанокот предизвика бројни реакции на социјалните мрежи.

Камерите го „уловија“ моментот

Како што се гледа на снимката, Мелони – која седеше помеѓу Трамп и германскиот канцелар Фридрих Мерц – се смееше додека Трамп зборуваше, но во еден момент го сврте погледот и демонстративно преврте со очите.

„Се однесува љубезно кон Трамп, а потоа превртува со очите“, коментираше еден корисник на социјалните мрежи, објавувајќи го видеото од состанокот.

Состанокот, покрај официјалната агенда, беше обележан и со други интересни моменти – како шегата на Трамп со Мерц, коментарите за Путин кои американскиот претседател ги изговори со вклучен микрофон, како и оделото што конечно го облече Зеленски.

Исто и со Мерц

Премиерката на Италија се однесуваше невообичаено и за време на говорот на Мерц, на почетокот од јавниот дел од состанокот. Седејќи меѓу двајцата лидери, таа неколку пати гледаше кон таванот, а потоа почна да превртува со очите, што веднаш го привлече вниманието на камерите.

Многумина го протолкуваа нејзиното однесување како знак на здодевност или нетрпение кон разговорите. Ова, всушност, не е првпат Мелони да биде „уловена“ со слични гримаси – и претходно камерите ја регистрираа како превртува со очите за време на средба со францускиот претседател Емануел Макрон, кој исто така присуствуваше на состанокот во Белата куќа.

Историски состанок

За време на овој „историски состанок“ на Трамп, Зеленски и европските лидери – германскиот канцелар Фридрих Мерц, францускиот претседател Емануел Макрон, финскиот премиер Александар Стуб, британскиот премиер Кир Стармер, италијанската премиерка Џорџа Мелони, генералниот секретар на „НАТО“ Марк Руте и претседателката на Европската комисија Урсула фон дер Лајен – беше направен најголемиот исчекор досега кон потенцијално решавање на повеќегодишниот конфликт во Европа.

Америка, според најавите, е подготвена да даде конкретни безбедносни гаранции за Украина, а Трамп изјави дека започнал подготовки за директен состанок меѓу Путин и Зеленски, за кој е уверен дека може да биде клучен за ставање крај на војната.